ᠡᠷᠲᠡ ᠤᠷᠢᠳᠦ ᠴᠠᠭ ᠲᠤ ᠴᠤᠤᠲᠤ ᠶᠢᠨ ᠴᠠᠭᠠᠭᠴᠢ ᠭᠡᠭᠦᠦ ᠭᠡᠵᠦ ᠪᠠᠶᠢᠵᠡᠢ ᠃ ᠲᠡᠷᠡ ᠴᠤᠯᠮᠤᠨ ᠴᠤᠬᠤᠷ ᠤᠨᠠᠭᠠ ᠲᠠᠢ ᠳᠠᠯᠠᠨ ᠬᠤᠯᠠᠭᠴᠢ ᠭᠡᠭᠦᠦ ᠲᠡᠢ ᠂ ᠳᠠᠷᠬᠠᠨ ᠬᠤᠯᠠ ᠠᠵᠢᠷᠭᠠ ᠲᠠᠢ ᠶᠤᠮ ᠰᠠᠨᠵᠡᠢ ᠃ ᠨᠢᠭᠡ ᠡᠳᠦᠷ ᠴᠤᠤᠲᠤ ᠶᠢᠨ ᠴᠠᠭᠠᠭᠴᠢ ᠭᠡᠭᠦᠦ ᠴᠤᠯᠮᠤᠨ ᠴᠤᠬᠤᠷ ᠤᠨᠠᠭᠠ ᠲᠠᠢ ᠪᠡᠨ ᠨᠠᠭᠤᠷ ᠤᠨ ᠬᠦᠪᠡᠭᠡ ᠪᠡᠷ ᠢᠳᠡᠰᠢᠯᠡᠵᠦ ᠶᠠᠪᠤᠵᠤ ᠪᠠᠶᠢᠲᠠᠯᠠ ᠴᠤᠯᠮᠤᠨ ᠴᠤᠬᠤᠷ ᠤᠨᠠᠭᠠ ᠨᠢ ᠰᠦᠷᠦᠭ ᠡᠴᠡ ᠪᠡᠨ ᠬᠤᠴᠤᠷᠤᠨ ᠲᠤᠭᠯᠠᠵᠤ ᠲᠤᠩᠭᠤᠴᠢᠵᠤ ᠪᠠᠶᠢᠭᠠᠳ ᠴᠠᠭᠠᠨ ᠰᠢᠪᠠᠭᠤᠨ ᠤ ᠦᠨᠳᠡᠭᠡ ᠶᠢ ᠬᠠᠭᠠ ᠭᠢᠰᠬᠢᠴᠢᠬᠡᠵᠦ ᠭᠡᠨᠡ ᠃ ᠲᠡᠭᠡᠲᠡᠯᠡ ᠰᠢᠪᠠᠭᠤᠨ ᠤ ᠴᠡᠷᠢᠭ ᠦᠳ ᠲᠡᠭᠦᠨ ᠢ ᠬᠦᠭᠡᠭᠡᠵᠦ ᠢᠷᠡᠭᠡᠳ ᠲᠠᠯᠠ ᠪᠦᠷᠢ ᠡᠴᠡ ᠨᠢ ᠬᠠᠷᠪᠤᠬᠤ ᠭᠡᠵᠡᠢ ᠃ ᠴᠤᠤᠲᠤ ᠶᠢᠨ ᠴᠠᠭᠠᠭᠴᠢ ᠭᠡᠭᠦᠦ ᠴᠤᠯᠮᠤᠨ ᠴᠤᠬᠤᠷ ᠤᠨᠠᠭᠠ ᠪᠡᠨ ᠤᠷᠲᠤ ᠠᠴᠠ ᠨᠢ ᠬᠠᠷᠪᠤᠬᠤ ᠪᠠᠷ ᠬᠤᠶᠢᠨᠠ ᠪᠠᠨ ᠤᠷᠤᠭᠤᠯᠵᠤ ᠬᠤᠶᠢᠨᠠ ᠠᠴᠠ ᠨᠢ ᠬᠠᠷᠪᠤᠬᠤ ᠪᠠᠷ ᠤᠷᠲᠤ ᠪᠠᠨ ᠤᠷᠤᠭᠤᠯᠵᠤ ᠪᠠᠷᠠᠭᠤᠨ ᠲᠠᠯᠠ ᠠᠴᠠ ᠨᠢ ᠬᠠᠷᠪᠤᠬᠤ ᠪᠠᠷ ᠵᠡᠭᠦᠨ ᠲᠠᠯᠠ ᠳᠤ ᠪᠠᠨ ᠭᠠᠷᠭᠠᠭᠠᠳ ᠵᠡᠭᠦᠨ ᠲᠠᠯᠠ ᠠᠴᠠ ᠨᠢ ᠬᠠᠷᠪᠤᠬᠤ ᠪᠠᠷ ᠪᠠᠷᠠᠭᠤᠨ ᠲᠠᠯᠠ ᠳᠤ ᠪᠠᠨ ᠤᠷᠤᠭᠤᠯᠤᠭᠠᠳ ᠳᠦᠷᠪᠡᠨ ᠵᠦᠭ ᠨᠠᠢᠮᠠᠨ ᠵᠤᠪᠬᠢᠰ ᠠᠴᠠ ᠨᠢ ᠳᠠᠭᠠᠷᠢᠭᠰᠠᠨ ᠠᠶᠤᠯ ᠠᠴᠠ ᠴᠤᠯᠮᠤᠨ ᠴᠤᠬᠤᠷ ᠤᠨᠠᠭᠠ ᠪᠡᠨ ᠬᠠᠮᠠᠭᠠᠯᠠᠵᠤ ᠠᠮᠢ ᠶᠢ ᠨᠢ ᠠᠪᠤᠷᠠᠵᠡᠢ ᠃ ᠬᠠᠷᠢᠨ ᠡᠵᠢ ᠶᠢᠨ ᠬᠢ ᠨᠢ ᠪᠡᠶᠡ ᠳᠦ ᠰᠢᠪᠠᠭᠤᠨ ᠤ ᠴᠡᠷᠢᠭ ᠦᠳ ᠦᠨ ᠬᠠᠷᠪᠤᠭᠰᠠᠨ ᠰᠤᠮᠤᠨ ᠤ ᠤᠷᠤᠮ ᠢᠶᠠᠷ ᠡᠨᠳᠡ ᠲᠡᠨᠳᠡ ᠦᠭᠡᠢ ᠴᠢᠰᠤ ᠨᠡᠪᠴᠢᠵᠦ ᠡᠪᠡᠷᠦᠨ ᠬᠠᠲᠠᠭᠰᠠᠨ ᠢ ᠴᠤᠯᠮᠤᠨ ᠴᠤᠬᠤᠷ ᠤᠨᠠᠭᠠ ᠦᠵᠡᠭᠡᠳ ᠄
- ᠡᠵᠢ ᠡ ᠂ ᠲᠠᠨ ᠤ ᠪᠡᠶᠡ ᠳᠦ ᠡᠨᠳᠡ ᠲᠡᠨᠳᠡ ᠦᠭᠡᠢ ᠠᠷᠪᠠᠶᠢᠵᠤ ᠪᠠᠷᠵᠠᠶᠢᠵᠤ ᠪᠠᠶᠢᠭᠠ ᠴᠢᠨᠢ ᠶᠠᠭᠤ ᠶᠤᠮ ᠪᠤᠢ ︖ ᠭᠡᠵᠦ ᠠᠰᠠᠭᠤᠵᠤ ᠭᠡᠨᠡ ᠃ ᠴᠤᠤᠲᠤ ᠶᠢᠨ ᠴᠠᠭᠠᠭᠴᠢ ᠭᠡᠭᠦᠦ᠄
- ᠦᠯᠢ ᠶᠢᠨ ᠳᠠᠪᠠᠭᠠ ᠪᠠᠷ ᠳᠠᠪᠠᠬᠤ ᠳᠤ ᠦᠯᠦᠨ ᠂ ᠰᠢᠪᠠᠬᠠᠢ ᠨᠠᠭᠠᠯᠳᠤᠭᠠ ᠪᠢᠵᠡ ᠭᠡᠵᠦ ᠭᠡᠨᠡ ᠃ ᠴᠠᠰᠢ ᠶᠠᠪᠤᠵᠤ ᠪᠠᠶᠢᠲᠠᠯᠠ ᠴᠤᠯᠮᠤᠨ ᠴᠤᠬᠤᠷ ᠤᠨᠠᠭᠠ ᠄
- ᠡᠵᠢ ᠡ ᠂ ᠲᠠᠨ ᠤ ᠪᠡᠶᠡ ᠠᠴᠠ ᠡᠨᠳᠡ ᠲᠡᠨᠳᠡ ᠦᠭᠡᠢ ᠴᠢᠰᠤ ᠭᠠᠷᠤᠭᠠᠳ ᠪᠠᠶᠢᠳᠠᠭ ᠨᠢ ᠶᠠᠭᠤ ᠪᠢᠯᠡ ᠭᠡᠵᠦ ᠭᠡᠨᠡ ᠃ ᠡᠵᠢ ᠨᠢ ᠄
- ᠬᠠᠷᠭᠠᠨᠠᠲᠤ ᠶᠢᠨ ᠲᠠᠷᠪᠠᠭᠠ ᠪᠠᠷ ᠳᠠᠪᠠᠬᠤ ᠦᠶᠡ ᠳᠦ ᠬᠠᠷᠭᠠᠨᠠ ᠶᠢᠨ ᠦᠷᠭᠡᠰᠦ ᠬᠠᠳᠬᠤᠭᠤᠷ ᠤᠷᠠᠭᠰᠠᠨ ᠪᠢᠵᠡ ᠡ ᠭᠡᠵᠦ ᠭᠡᠨᠡ ᠃
- ᠪᠠᠰᠠ ᠴᠠᠰᠢ ᠶᠠᠪᠤᠵᠤ ᠪᠠᠶᠢᠲᠠᠯᠠ ᠴᠤᠯᠮᠤᠨ ᠴᠤᠬᠤᠷ ᠤᠨᠠᠭᠠ ᠨᠢ ᠄
- ᠡᠵᠢ ᠡ ᠂ ᠲᠠᠨ ᠤ ᠬᠤᠶᠠᠷ ᠴᠢᠬᠢ ᠶᠠᠭᠠᠬᠢᠭᠠᠳ ᠳᠠᠯᠪᠠᠯᠵᠠᠭᠠᠳ ᠪᠠᠶᠢᠭᠠ ᠶᠤᠮ ᠪᠤᠢ ︖ ᠭᠡᠬᠦ ᠳᠦ ᠡᠵᠢ ᠨᠢ ᠄
- ᠢᠯᠠᠭᠠᠲᠤ ᠶᠢᠨ ᠲᠠᠷᠪᠠᠭᠠ ᠪᠠᠷ ᠳᠠᠪᠠᠬᠤ ᠦᠶᠡ ᠳᠦ ᠢᠯᠠᠭᠠ ᠰᠢᠮᠠᠭᠤᠯ ᠦᠷᠭᠡᠭᠡᠭᠰᠡᠭᠡᠷ ᠪᠠᠶᠢᠭᠠᠳ ᠯᠠ ᠲᠡᠷᠡ ᠪᠢᠵᠡ ᠭᠡᠵᠡᠢ ᠃
- ᠲᠡᠭᠦᠨ ᠡᠴᠡ ᠴᠠᠰᠢ ᠶᠠᠪᠤᠵᠤ ᠪᠠᠶᠢᠲᠠᠯᠠ ᠴᠤᠯᠮᠤᠨ ᠴᠤᠬᠤᠷ ᠤᠨᠠᠭᠠ ᠨᠢ ᠄
- ᠡᠵᠢ ᠡ ᠂ ᠲᠠᠨ ᠤ ᠬᠤᠶᠠᠷ ᠬᠠᠮᠠᠷ ᠴᠢᠨᠢ ᠶᠠᠭᠠᠬᠢᠭᠠᠳ ᠰᠠᠷᠲᠠᠯᠵᠠᠭᠠᠳ ᠪᠠᠶᠢᠭᠠ ᠶᠤᠮ ᠪᠤᠢ ︖ ᠭᠡᠵᠦ ᠭᠡᠨᠡ ᠃ ᠴᠤᠤᠲᠤ ᠶᠢᠨ ᠴᠠᠭᠠᠭᠴᠢ ᠭᠡᠭᠦᠦ ᠄
- ᠢᠯᠠᠭᠠ ᠂ ᠰᠢᠮᠠᠭᠤᠯ ᠬᠠᠮᠠᠷ ᠠᠮᠠᠨ ᠳᠡᠭᠡᠷᠡ ᠰᠠᠭᠤᠬᠤ ᠪᠠᠷ ᠲᠤᠷᠭᠢᠵᠤ ᠦᠷᠭᠦᠭᠡᠬᠦ ᠪᠡᠷ ᠯᠠ ᠲᠡᠭᠡᠵᠦ ᠬᠠᠷᠠᠭᠳᠠᠭᠠ ᠪᠠᠶᠢᠯᠭᠦᠢ ᠭᠡᠵᠦ ᠭᠡᠨᠡ ᠃ ᠢᠩᠬᠢᠵᠦ ᠶᠠᠪᠤᠭᠰᠠᠭᠠᠷ ᠴᠤᠤᠲᠤ ᠶᠢᠨ ᠴᠠᠭᠠᠭᠴᠢ ᠭᠡᠭᠦᠦ ᠰᠤᠮᠤᠨ ᠤ ᠰᠢᠷᠬᠠ ᠂ ᠶᠠᠪᠤᠳᠠᠯ ᠤᠨ ᠶᠠᠷᠪᠢᠭ ᠲᠤ ᠡᠴᠡᠵᠦ ᠦᠬᠦᠬᠦ ᠪᠤᠯᠵᠤ ᠭᠡᠨᠡ ᠃ ᠲᠡᠭᠡᠭᠡᠳ ᠤᠨᠠᠭᠠᠨ ᠳᠤ ᠪᠠᠨ ᠄
- ᠵᠠ ᠤᠳᠤ ᠡᠵᠢ ᠨᠢ ᠦᠬᠦᠬᠦ ᠪᠤᠯᠤᠯᠠ ᠂ ᠴᠢ ᠮᠢᠨᠤ ᠦᠭᠡ ᠶᠢ ᠠᠩᠬᠠᠷᠴᠤ ᠰᠠᠶᠢᠨ ᠰᠤᠨᠤᠰ ︕
- ᠦᠨᠳᠦᠷ ᠭᠠᠵᠠᠷ ᠰᠡᠷᠢᠭᠦᠨ ᠪᠠᠶᠢᠳᠠᠭ ᠨᠠᠮ ᠭᠠᠵᠠᠷ ᠤᠨᠲᠠᠵᠤ ᠪᠠᠶᠢᠭᠠᠷᠠᠢ ᠂ ᠨᠦᠮᠦᠷᠢ ᠨᠦᠭᠡᠯᠭᠡᠲᠡᠢ ᠪᠠᠶᠢᠳᠠᠭ ᠶᠤᠮ ᠃ ᠨᠠᠮᠠᠶᠢ ᠦᠬᠦᠬᠦ ᠪᠡᠷ ᠨᠢᠭᠡ ᠳᠤᠯᠤᠭᠠᠨ ᠬᠤᠨᠤᠭ ᠪᠠᠷᠠᠭᠤᠨ ᠭᠤᠶᠠᠨ ᠠᠴᠠ ᠮᠢᠨᠢ ᠰᠢᠬᠢᠷ ᠪᠤᠷᠠᠮ ᠭᠠᠷᠤᠨᠠ ᠂ ᠲᠡᠭᠦᠨ ᠢ ᠢᠳᠡ ᠃ ᠳᠠᠷᠠᠭᠠᠴᠢ ᠶᠢᠨ ᠨᠢᠭᠡ ᠳᠤᠯᠤᠭᠠ ᠬᠤᠨᠤᠭ ᠵᠡᠭᠦᠨ ᠭᠤᠶᠠᠨ ᠠᠴᠠ ᠮᠢᠨᠢ ᠴᠡᠴᠡᠭ ᠵᠢᠮᠢᠰ ᠭᠠᠷᠤᠨᠠ ᠂ ᠲᠡᠭᠦᠨ ᠢ ᠢᠳᠡ ᠃ ᠲᠡᠭᠡᠭᠡᠳ ᠢᠵᠢᠯᠢ ᠶᠢᠨ ᠢᠶᠡᠨ ᠬᠤᠶᠢᠨᠠ ᠠᠴᠠ ᠶᠠᠪᠤᠵᠤ ᠨᠤᠲᠤᠭ ᠢᠶᠠᠨ ᠪᠠᠷᠠᠳᠠ ᠭᠡᠵᠦ ᠵᠠᠬᠢᠵᠡᠢ ᠃ ᠭᠡᠭᠦᠦ ᠴᠤᠯᠮᠤᠨ ᠴᠤᠬᠤᠷ ᠤᠨᠠᠭᠠ ᠡᠵᠢ ᠶᠢᠨ ᠢᠶᠡᠨ ᠬᠡᠯᠡᠵᠦ ᠵᠢᠭᠠᠭᠰᠠᠨ ᠢ ᠶᠤᠰᠤᠴᠢᠯᠠᠨ ᠳᠠᠭᠠᠯ ᠦᠭᠡᠢ ᠠᠭᠤᠯᠠ ᠶᠢᠨ ᠬᠢᠷᠠ ᠳᠤ ᠤᠨᠲᠠᠵᠤ ᠬᠡᠳᠦ ᠬᠡᠳᠦᠨ ᠤᠳᠠᠭᠠ ᠳᠠᠭᠠᠷᠠᠵᠤ ᠬᠦᠷᠦᠵᠦ ᠵᠤᠪᠠᠯᠠᠩ ᠠᠮᠰᠠᠭᠠᠳ ᠬᠠᠰᠢᠷᠠᠬᠤ ᠳᠤ ᠪᠠᠨ ᠡᠩᠭᠡᠷ ᠨᠦᠮᠦᠷᠢ ᠭᠠᠵᠠᠷ ᠤᠨᠲᠠᠵᠤ ᠰᠤᠷᠴᠠᠢ ᠃
ᠲᠡᠭᠡᠭᠡᠳ ᠢᠵᠢᠯᠢ ᠰᠦᠷᠦᠭ ᠢᠶᠡᠨ ᠡᠷᠢᠵᠦ ᠠᠶᠢᠯ ᠠᠮᠢᠲᠠᠨ ᠤ ᠬᠤᠲᠠᠨ ᠤ ᠵᠠᠬᠠ ᠪᠠᠷ ᠶᠠᠪᠤᠬᠤ ᠳᠤ ᠨᠤᠬᠠᠢ ᠨᠢ ᠪᠤᠷᠭᠤᠵᠤ ᠂ ᠬᠡᠦᠬᠡᠳ ᠨᠢ ᠬᠦᠭᠡᠭᠡᠵᠦ ᠲᠠᠭᠤᠭᠠᠳ ᠱᠤᠭᠯᠠᠭᠠᠳ ᠪᠤᠯᠬᠤ ᠦᠭᠡᠢ ᠪᠠᠶᠢᠵᠡᠢ ᠃ ᠲᠡᠷᠡ ᠡᠨᠡ ᠮᠡᠲᠦ ᠵᠤᠪᠠᠯᠠᠩ ᠪᠡᠶᠡ ᠪᠡᠷ ᠲᠤᠭᠤᠯᠵᠤ ᠠᠷᠠᠢᠬᠠᠨ ᠡᠬᠡ ᠨᠤᠲᠤᠭ ᠲᠤ ᠪᠠᠨ ᠢᠷᠡᠵᠦ ᠳᠠᠯᠠᠨ ᠬᠤᠯᠠᠭᠴᠢ ᠭᠡᠭᠦᠦ ᠲᠡᠢ ᠂ ᠳᠠᠷᠬᠠᠨ ᠬᠤᠯᠠ ᠠᠵᠢᠷᠭᠠ ᠲᠠᠢ ᠢᠵᠢᠯᠢ ᠰᠦᠷᠦᠭ ᠲᠤ ᠪᠠᠨ ᠡᠰᠡᠨ ᠮᠡᠨᠳᠦ ᠨᠡᠶᠢᠯᠡᠵᠦ ᠰᠠᠨᠠᠭᠠ ᠠᠮᠤᠷ ᠵᠢᠷᠭᠠᠵᠡᠢ ᠃