ᠠᠳᠤᠭᠤ ᠶᠢ ᠬᠥᠩᠭᠡᠯᠡᠬᠦ ᠳᠦ ᠪᠡᠨ ᠠᠵᠢᠯ ᠤᠨ ᠬᠡᠷᠡᠭᠴᠡᠭᠡ ᠴᠢᠭᠯᠡᠯ ᠡᠴᠡ ᠰᠢᠯᠲᠠᠭᠠᠯᠠᠨ ᠡᠷᠲᠡ ᠣᠷᠣᠢ ᠪᠤᠶᠤ ᠨᠠᠰᠤᠨ ᠤ ᠶᠠᠩᠵᠤ ᠪᠦᠷᠢ ᠶᠢᠨ ᠦᠶᠡ ᠱᠠᠲᠤᠨ ᠳᠤ ᠬᠥᠩᠭᠡᠯᠡᠨᠡ᠃ ᠬᠥᠳᠡᠷ ᠯᠠᠭᠱᠠᠨ ᠮᠢᠬᠠᠯᠢᠭ ᠪᠢᠷᠠ ᠲᠠᠢ ᠠᠵᠢᠯ ᠤᠨ ᠮᠣᠷᠢ ᠪᠤᠢ ᠪᠣᠯᠭᠠᠶᠠ ᠭᠡᠪᠡᠯ ᠨᠠᠰᠤ ᠶᠢ ᠨᠢ ᠠᠬᠢᠭᠤᠯᠵᠤ ᠬᠥᠩᠭᠡᠯᠡᠬᠦ᠂ ᠬᠥᠩᠭᠡᠨ ᠬᠥᠯᠲᠡᠢ ᠨᠢᠮᠭᠡᠨ ᠪᠡᠶᠡ ᠲᠡᠢ ᠤᠨᠤᠯᠭᠠ ᠶᠢᠨ᠂ ᠭᠣᠶᠣᠯ ᠤᠨ ᠮᠣᠷᠢ ᠪᠤᠢ ᠪᠣᠯᠬᠤ ᠳᠤ ᠳᠠᠭᠠ ᠠᠴᠠ ᠨᠢ ᠬᠥᠩᠭᠡᠯᠡᠬᠦ ᠬᠡᠷᠡᠭᠲᠡᠢ᠃
ᠠᠳᠤᠭᠤ ᠶᠢ ᠠᠭᠲᠠᠯᠠᠬᠤ ᠠᠵᠢᠯ ᠬᠦᠮᠦᠨ ᠦ ᠰᠠᠨᠠᠭᠠᠨ ᠤ ᠳᠤᠷᠠ ᠪᠠᠷ ᠪᠠᠶᠢᠵᠤ ᠪᠣᠯᠬᠤ ᠦᠭᠡᠢ᠃ ᠤᠴᠢᠷ ᠨᠢ ᠭᠡᠪᠡᠯ ᠲᠠᠯᠪᠢᠬᠤ ᠦᠷᠢᠶᠡ ᠶᠢ ᠰᠣᠩᠭᠣᠨ ᠣᠯᠵᠤ ᠵᠣᠣ ᠮᠠᠯ ᠡᠮᠨᠡᠯᠭᠡ ᠶᠢᠨ ᠪᠠᠶᠢᠭᠤᠯᠤᠯᠭᠠ ᠠᠴᠠ ᠦᠵᠡᠵᠦ ᠰᠢᠯᠭᠠᠭᠰᠠᠨ ᠦᠨᠳᠦᠰᠦᠨ ᠳᠦ ᠲᠡᠭᠦᠨ ᠦ ᠤᠳᠤᠷᠢᠳᠤᠯᠭᠠ ᠬᠢᠨᠠᠯᠲᠠ ᠶᠢᠨ ᠳᠣᠣᠷᠠ ᠬᠢᠳᠡᠭ ᠬᠠᠷᠢᠭᠤᠴᠠᠯᠭᠠ ᠲᠠᠢ ᠠᠵᠢᠯ ᠶᠤᠮ᠃ ᠠᠳᠤᠭᠤ ᠶᠢ ᠵᠠᠰᠠᠬᠤ ᠶᠢᠨ ᠡᠮᠦᠨᠡ ᠤᠨᠠᠭᠠᠵᠤ ᠪᠡᠬᠢᠯᠡᠬᠦ᠂ ᠬᠤᠤᠬᠠᠨᠠᠭ ᠤᠨ ᠭᠠᠳᠠᠨᠠᠬᠢ ᠠᠷᠠᠰᠤ ᠶᠢ ᠰᠠᠪᠤᠩ ᠲᠠᠢ ᠪᠦᠯᠢᠶᠡᠨ ᠤᠰᠤ ᠪᠠᠷ ᠤᠭᠢᠶᠠᠵᠤ ᠴᠡᠪᠡᠷᠯᠡᠬᠦ ᠵᠡᠷᠭᠡ ᠪᠡᠯᠡᠳᠬᠡᠯ ᠢ ᠬᠢᠨᠡ᠃
ᠵᠠᠰᠠᠯᠭᠠ ᠬᠢᠬᠦ ᠳᠦ ᠪᠡᠨ ᠵᠥᠪ ᠲᠠᠯᠠ ᠶᠢᠨ ᠬᠤᠤᠬᠠᠨᠠᠭ ᠢ ᠲᠡᠭᠦᠨ ᠦ ᠵᠠᠭᠠᠳᠠᠰᠤᠨ ᠠᠴᠠ 1.5 ᠰᠠᠨ᠋ᠲ᠋ᠢᠮᠧᠲᠷ ᠦᠨ ᠵᠠ ᠶᠢᠲᠠᠢ ᠵᠡᠷᠭᠡᠴᠡᠭᠦᠯᠦᠨ ᠲᠥᠮᠦᠰᠦᠭᠡᠨ ᠦ ᠤᠷᠳᠤ ᠦᠵᠦᠭᠦᠷ ᠡᠴᠡ ᠬᠣᠶᠢᠲᠤ ᠢᠷᠮᠡᠭ ᠬᠦᠷᠲᠡᠯᠡ ᠳᠣᠷᠤᠭᠰᠢ ᠤᠷᠲᠤ ᠬᠠᠭᠠᠯᠭᠠ ᠬᠢᠨᠡ᠃ ᠠᠷᠠᠰᠤᠨ ᠤ ᠪᠦᠬᠦ ᠦᠶᠡ ᠳᠠᠪᠬᠤᠷ ᠢ ᠨᠢᠭᠡ ᠤᠳᠠᠭᠠ ᠶᠢᠨ ᠵᠦᠰᠦᠯᠲᠡ ᠪᠡᠷ ᠢᠷᠠᠨᠠ᠃ ᠢᠩᠭᠢᠵᠦ ᠳᠤᠷᠤᠭᠰᠢ ᠤᠷᠲᠤ ᠬᠠᠭᠠᠯᠭᠠ ᠬᠢᠬᠦ ᠶᠠᠪᠤᠳᠠᠯ ᠵᠠᠰᠠᠯᠭᠠ ᠶᠢᠨ ᠳᠠᠷᠠᠭᠠᠬᠢ ᠬᠦᠨᠳᠦᠷᠡᠯᠲᠡ ᠡᠴᠡ ᠰᠡᠷᠭᠡᠶᠢᠯᠡᠬᠦ ᠠᠴᠢ ᠬᠣᠯᠪᠣᠭᠳᠠᠯ ᠲᠠᠢ᠃ ᠡᠭᠦᠨ ᠦ ᠳᠠᠷᠠᠭᠠ ᠶᠡᠷᠦᠩᠬᠡᠢ ᠰᠠᠪᠠ ᠪᠦᠷᠬᠦᠪᠴᠢ ᠶᠢ ᠬᠠᠭᠠᠯᠬᠤ ᠳᠤ ᠪᠠᠨ ᠤᠷᠢᠳ ᠢᠶᠠᠷ ᠲᠥᠮᠦᠰᠦᠭᠡ ᠶᠢᠨ ᠬᠣᠶᠢᠲᠤ ᠦᠵᠦᠭᠦᠷ ᠦᠨ ᠪᠦᠷᠬᠦᠪᠴᠢ ᠶᠢ ᠬᠢᠲᠤᠭᠠᠨ ᠤ ᠦᠵᠦᠭᠦᠷ ᠢᠶᠡᠷ ᠢᠷᠠᠵᠤ ᠳᠠᠷᠠᠭᠠ ᠲᠡᠭᠦᠨ ᠦ ᠤᠷᠢᠳᠤ ᠦᠵᠦᠭᠦᠷ ᠢ ᠮᠥᠨ ᠠᠳᠠᠯᠢ ᠢᠷᠠᠨᠠ᠃
ᠢᠩᠭᠢᠭᠡᠳ ᠳᠡᠭᠡᠷᠡᠬᠢ ᠬᠣᠶᠠᠷ ᠢᠷᠠᠩᠬᠠᠢ ᠶᠢᠨ ᠬᠣᠭᠣᠷᠣᠨᠳᠣᠬᠢ ᠪᠦᠷᠬᠦᠪᠴᠢ ᠶᠢ ᠬᠠᠶᠢᠴᠢᠯᠠᠨᠠ᠃ ᠶᠡᠷᠦᠩᠬᠡᠢ ᠰᠠᠪᠠ ᠪᠦᠷᠬᠦᠪᠴᠢ ᠠᠷᠠᠰᠤ ᠬᠣᠶᠠᠷ ᠤᠨ ᠢᠷᠠᠯᠲᠠ ᠶᠢᠨ ᠤᠷᠲᠤ ᠪᠣᠭᠣᠨᠢ ᠨᠢ ᠲᠡᠩᠴᠡᠭᠦᠦ ᠪᠣᠯᠬᠤ ᠤᠴᠢᠷ ᠠᠴᠠ ᠶᠠᠮᠠᠷ ᠨᠢᠭᠡ ᠤᠭᠤᠲᠠ ᠡᠭᠦᠰᠴᠦ ᠨᠡᠪᠴᠢᠳᠡᠰᠦ ᠬᠤᠷᠠᠯᠳᠤᠬᠤ ᠠᠶᠤᠯ ᠭᠠᠷᠬᠤ ᠦᠭᠡᠢ ᠶᠡᠷᠦᠩᠬᠡᠢ ᠰᠠᠪᠠ ᠪᠦᠷᠬᠦᠪᠴᠢ ᠶᠢ ᠬᠠᠭᠠᠯᠤᠮᠠᠭᠴᠠ ᠲᠡᠭᠦᠨ ᠦ ᠳᠣᠲᠣᠷᠠ ᠠᠴᠠ ᠲᠥᠮᠦᠰᠦᠭᠡ ᠤᠨᠵᠢᠨ ᠬᠠᠷᠠᠭᠳᠠᠨᠠ᠃ ᠲᠡᠷᠡ ᠤᠨᠵᠢᠵᠤ ᠪᠠᠶᠢᠭᠠ ᠲᠥᠮᠦᠰᠦᠭᠡᠨ ᠦ ᠦᠲᠦᠷᠢᠶᠡ ᠰᠢᠨᠳᠠᠰᠤ ᠶᠢ ᠮᠡᠰᠡ ᠵᠠᠰᠠᠯᠠᠯ ᠤᠨ ᠬᠢᠮᠰᠠ ᠪᠠᠷ ᠬᠠᠪᠴᠢᠵᠤ ᠲᠡᠭᠦᠨ ᠦ ᠬᠥᠪᠴᠢᠷᠬᠡᠢ᠂ ᠦᠲᠦᠷᠢᠶᠡ ᠰᠢᠨᠳᠠᠰᠤ ᠶᠢ ᠬᠠᠶᠢᠴᠢᠯᠠᠬᠤ ᠳᠤ ᠮᠠᠯ ᠲᠥᠮᠦᠰᠦᠭᠡ ᠪᠡᠨ ᠳᠣᠲᠣᠭᠰᠢ ᠨᠢ ᠲᠠᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠨᠠ᠃
ᠪᠤᠷᠤᠭᠤ ᠲᠠᠯᠠ ᠶᠢᠨ ᠲᠥᠮᠦᠰᠦᠭᠡ ᠶᠢ ᠡᠨᠡ ᠮᠠᠶ᠋ᠢᠭ ᠢᠶᠠᠷ ᠢᠷᠠᠵᠤ ᠭᠠᠷᠲᠠᠨᠠ᠃ ᠲᠥᠮᠦᠰᠦᠭᠡ ᠶᠢ ᠲᠠᠰᠤ ᠣᠭᠲᠣᠯᠬᠤ ᠳᠤ ᠪᠠᠨ ᠵᠠᠰᠠᠯᠭᠠ ᠶᠢᠨ ᠪᠠᠬᠢ ᠪᠠᠷ ᠲᠠᠰᠤ ᠤᠭᠳᠤᠯᠬᠤ᠂ ᠰᠠᠪᠰᠠᠯᠭᠠᠳᠠᠵᠤ ᠲᠠᠰᠤᠯᠬᠤ ᠤᠲᠠᠰᠤ ᠪᠠᠷ ᠪᠣᠭᠣᠵᠤ ᠤᠭᠳᠤᠯᠬᠤ ᠵᠡᠷᠭᠡ ᠬᠡᠳᠦᠨ ᠶᠠᠩᠵᠤ ᠶᠢᠨ ᠠᠷᠭᠠ ᠶᠢ ᠬᠡᠷᠡᠭᠯᠡᠨᠡ᠃
ᠵᠠᠰᠠᠯᠭᠠ ᠶᠢᠨ ᠬᠠᠪᠴᠢᠭᠤᠷ ᠬᠡᠷᠡᠭᠯᠡᠬᠦ᠃ 1᠂ ᠮᠠᠯ ᠤᠨ ᠲᠥᠮᠦᠰᠦᠭᠡ ᠶᠢ ᠵᠠᠰᠠᠯᠭᠠ ᠶᠢᠨ ᠬᠠᠪᠴᠢᠭᠤᠷ ᠢᠶᠠᠷ ᠬᠠᠪᠴᠢᠵᠤ ᠲᠠᠰᠤᠯᠬᠤ ᠳᠤ ᠪᠠᠨ ᠲᠥᠮᠦᠰᠦᠭᠡ ᠶᠢ ᠲᠡᠭᠦᠨ ᠦ ᠬᠥᠪᠴᠢᠷᠬᠡᠢ ᠶᠢᠨ ᠳᠡᠩᠭᠡᠯᠢᠭ ᠦᠨ ᠳᠠᠭᠠᠤ 180 ᠭᠷᠠᠳᠦᠶᠰ ᠡᠷᠭᠢᠭᠦᠯᠦᠨ ᠬᠠᠪᠴᠢᠵᠤ 10-12 ᠡᠷᠭᠢᠭᠦᠯᠦᠭᠰᠡᠨ ᠦ ᠳᠠᠷᠠᠭᠠ ᠲᠠᠰᠤᠷᠠᠨ ᠤᠨᠠᠨᠠ᠃
ᠪᠠᠬᠢ ᠶᠢ ᠠᠳᠤᠭᠤᠨ ᠤ ᠨᠠᠰᠤᠨ ᠤ ᠲᠣᠭᠠ ᠲᠠᠢ ᠲᠡᠩᠴᠡᠭᠦᠦ ᠮᠢᠨᠦ᠋ᠲ ᠪᠠᠷᠢᠬᠤ ᠬᠡᠷᠡᠭᠲᠡᠢ᠃ ᠬᠠᠷᠢᠨ ᠪᠦᠳᠦᠭᠦᠨ ᠵᠠᠰᠠᠯᠭᠠᠨ ᠳᠤ ᠪᠠᠬᠢ ᠶᠢ 10 ᠮᠢᠨᠦ᠋ᠲ ᠠᠴᠠ ᠢᠯᠡᠭᠦᠦ ᠤᠳᠠᠭᠠᠨ ᠬᠤᠭᠤᠴᠠᠭᠠ ᠲᠠᠢ ᠬᠠᠪᠴᠢᠬᠤ ᠬᠡᠷᠡᠭᠲᠡᠢ᠃ ᠰᠠᠪᠰᠠᠯᠭᠠ ᠶᠢ ᠠᠪᠬᠤ ᠶᠢᠨ ᠦᠶᠡ ᠳᠦ ᠢᠤᠳ᠋ ᠍ ᠤᠨ ᠬᠠᠨᠳᠠ ᠲᠦᠷᠬᠢᠵᠦ ᠴᠠᠭᠠᠨ ᠰᠲᠷᠧᠫᠲ᠋ᠣᠼᠢᠳ᠋ ᠤᠨ ᠨᠤᠨᠲᠠᠭ ᠴᠠᠴᠠᠨᠠ᠃
ᠰᠠᠪᠰᠠᠯᠭᠠ ᠬᠡᠷᠡᠭᠯᠡᠬᠦ ᠠᠷᠭᠠ ᠥᠷᠭᠡᠨ ᠬᠡᠷᠡᠭᠯᠡᠭᠳᠡᠳᠡᠭ ᠬᠠᠭᠤᠴᠢᠨ ᠤ ᠠᠷᠭᠠ ᠶᠤᠮ᠃
ᠮᠠᠯ ᠡᠮᠨᠡᠯᠭᠡ ᠶᠢᠨ ᠫᠷᠠᠺᠲ᠋ᠢᠭ ᠲᠤ ᠬᠡᠷᠡᠭᠯᠡᠵᠦ ᠪᠠᠶᠢᠭᠠ ᠰᠠᠪᠰᠠᠯᠭᠠ 15 ᠰᠠᠨ᠋ᠲ᠋ᠢᠮᠧᠲᠷ ᠤᠷᠲᠤ ᠨᠠᠷᠢᠬᠠᠨ 2 ᠮᠣᠳᠣ ᠪᠥᠭᠡᠳ 3-5 ᠰᠠᠨ᠋ᠲ᠋ᠢᠮᠧᠲᠷ ᠥᠷᠭᠡᠨ ᠪᠠᠶᠢᠨᠠ᠃ ᠰᠠᠪᠰᠠᠯᠭᠠ ᠶᠢᠨ 2 ᠦᠵᠦᠭᠦᠷ ᠲᠦ ᠣᠭᠣᠰᠣᠷ ᠲᠣᠭᠲᠠᠭᠠᠬᠤ ᠳᠤ ᠵᠣᠷᠢᠭᠤᠯᠤᠭᠰᠠᠨ ᠬᠡᠷᠴᠢᠶᠡᠰᠦ ᠭᠠᠷᠭᠠᠨᠠ᠃ ᠣᠯᠠᠨ ᠤᠳᠠᠭᠠ ᠬᠡᠷᠡᠭᠯᠡᠵᠦ ᠴᠢᠰᠤ ᠨᠥᠵᠢ ᠬᠠᠲᠠᠵᠤ ᠪᠣᠬᠢᠷᠳᠠᠭᠰᠠᠨ ᠰᠠᠪᠰᠠᠯᠭᠠ ᠶᠢ ᠤᠷᠢᠳ ᠢᠶᠠᠷ ᠰᠠᠶᠢᠲᠤᠷ ᠴᠡᠪᠡᠷᠯᠡᠵᠦ ᠬᠡᠷᠡᠭᠯᠡᠬᠦ ᠪᠠ ᠬᠠᠷᠢᠨ ᠦᠵᠦᠭᠦᠷ ᠢ ᠤᠶᠠᠵᠤ ᠪᠡᠬᠢᠯᠡᠨᠡ᠂ ᠬᠥᠪᠴᠢᠷᠬᠡᠢ ᠶᠢ ᠰᠠᠪᠰᠠᠯᠭᠠ ᠠᠴᠠ ᠰᠠᠯᠭᠠᠬᠤ ᠳᠤ ᠪᠠᠨ 1 ᠰᠠᠨ᠋ᠲ᠋ᠢᠮᠧᠲᠷ ᠵᠠᠶᠢᠲᠠᠢ ᠳᠣᠣᠭᠤᠷ ᠬᠠᠶᠢᠴᠢᠯᠠᠨ ᠣᠭᠲᠣᠯᠤᠨᠠ᠃ ᠰᠠᠪᠰᠠᠯᠭᠠ ᠶᠢ ᠮᠠᠯ ᠵᠠᠰᠠᠭᠠᠳ 12-24 ᠴᠠᠭ ᠪᠣᠯᠤᠭᠠᠳ ᠲᠠᠶᠢᠯᠵᠤ ᠠᠪᠤᠨᠠ᠃
ᠬᠥᠪᠴᠢᠷᠬᠡᠢ ᠶᠢ ᠪᠣᠭᠣᠵᠤ ᠬᠥᠩᠭᠡᠯᠡᠬᠦ ᠠᠷᠭᠠ ᠴᠢᠰᠤ ᠠᠯᠳᠠᠯᠲᠠ ᠠᠴᠠ ᠰᠡᠷᠭᠡᠶᠢᠯᠡᠬᠦ ᠬᠠᠮᠤᠭ ᠤᠨ ᠰᠠᠶᠢᠨ ᠠᠷᠭᠠ ᠪᠥᠭᠡᠳ ᠰᠠᠪᠰᠠᠯᠭᠠ ᠬᠡᠷᠡᠭᠯᠡᠬᠦ ᠡᠴᠡ ᠢᠯᠡᠭᠦᠦ ᠠᠰᠢᠭᠲᠠᠢ᠃ ᠬᠥᠪᠴᠢᠷᠬᠡᠢ ᠶᠢ ᠲᠠᠯᠠ ᠶᠢᠨ ᠪᠤᠭᠤᠯᠲᠠ ᠠᠴᠠ 1.5 ᠰᠠᠨ᠋ᠲ᠋ᠢᠮᠧᠲᠷ ᠳᠣᠣᠭᠤᠷ ᠲᠠᠰᠤ ᠣᠭᠲᠣᠯᠤᠨᠠ᠃
ᠬᠥᠩᠭᠡᠯᠡᠯᠲᠡ ᠶᠢᠨ ᠳᠠᠷᠠᠭᠠᠬᠢ ᠬᠦᠨᠳᠦᠷᠡᠯᠲᠡ ᠡᠴᠡ ᠬᠠᠮᠠᠭᠠᠯᠠᠬᠤ᠃ ᠦᠷᠢᠶᠡ ᠶᠢ ᠵᠠᠰᠠᠭᠰᠠᠨ ᠤ ᠳᠠᠷᠠᠭᠠᠬᠢ ᠬᠦᠨᠳᠦᠷᠡᠯᠲᠡ ᠡᠴᠡ ᠬᠠᠮᠠᠭᠠᠯᠠᠬᠤ ᠳᠤ ᠮᠠᠯᠴᠢᠨ ᠬᠦᠮᠦᠨ ᠦ ᠠᠩᠬᠠᠷᠤᠯ ᠥᠨᠳᠥᠷ ᠪᠠᠶᠢᠬᠤ ᠬᠡᠷᠡᠭᠲᠡᠢ᠃ ᠬᠥᠩᠭᠡᠯᠡᠭᠰᠡᠨ ᠦ ᠳᠠᠷᠠᠭᠠ ᠠᠳᠤᠭᠤ ᠶᠢ ᠤᠳᠠᠭᠠᠨ ᠬᠡᠪᠲᠡᠭᠦᠯᠵᠦ ᠪᠣᠯᠬᠤ ᠦᠭᠡᠢ᠃ ᠬᠡᠪᠲᠡᠭᠰᠡᠨ ᠠᠳᠤᠭᠤ ᠶᠢ ᠪᠣᠰᠬᠠᠵᠤ ᠬᠥᠳᠡᠯᠭᠡᠵᠦ ᠪᠠᠶᠢᠬᠤ ᠬᠡᠷᠡᠭᠲᠡᠢ᠃
ᠬᠤᠵᠢᠷ ᠲᠠᠢ ᠭᠠᠵᠠᠷ ᠲᠤ ᠪᠡᠯᠴᠢᠭᠡᠷᠯᠡᠭᠦᠯᠬᠦ ᠨᠢ ᠰᠢᠷᠬᠠᠨ ᠤ ᠡᠳᠡᠭᠡᠷᠡᠯᠲᠡ ᠶᠢ ᠤᠳᠠᠭᠠᠰᠢᠷᠠᠭᠤᠯᠬᠤ ᠪᠠ ᠰᠡᠳᠡᠷᠡᠭᠡᠵᠦ ᠪᠣᠯᠬᠤ ᠠᠶᠤᠯᠲᠠᠢ᠃
ᠴᠢᠰᠤ ᠶᠡᠬᠡ ᠠᠯᠳᠠᠬᠤ ᠠᠴᠠ ᠪᠣᠯᠭᠣᠮᠵᠢᠯᠠᠨ ᠡᠳᠦᠷ ᠪᠦᠬᠦᠨ ᠰᠢᠯᠭᠠᠵᠤ ᠦᠵᠡᠵᠦ ᠪᠠᠶᠢᠬᠤ ᠬᠡᠷᠡᠭᠲᠡᠢ᠃ ᠠᠳᠤᠭᠤ ᠬᠠᠵᠠᠵᠤ ᠬᠠᠭᠠᠷᠢᠬᠤ ᠰᠢᠷᠦᠭᠦᠨ ᠬᠥᠭᠡᠭᠡᠵᠦ ᠲᠠᠭᠤᠯᠭᠠᠬᠤ ᠶᠢ ᠡᠬᠢᠨ ᠦ 3-5 ᠬᠣᠨᠣᠭ ᠲᠤ ᠪᠣᠯᠭᠣᠮᠵᠢᠯᠠᠪᠠᠯ ᠵᠣᠬᠢᠨᠠ᠃
ᠠᠳᠤᠭᠤ ᠬᠥᠩᠭᠡᠯᠡᠭᠰᠡᠨ ᠦ ᠳᠠᠷᠠᠭᠠ ᠬᠤᠤᠬᠠᠨᠠᠭ ᠤᠨ ᠬᠠᠨᠠ ᠶᠢᠨ ᠰᠤᠳᠠᠰᠤ ᠦᠷᠡ ᠳᠠᠮᠵᠢᠭᠤᠯᠤᠭᠴᠢ ᠶᠢᠨ ᠰᠤᠳᠠᠰᠤᠨ ᠠᠴᠠ ᠴᠢᠰᠤ ᠭᠤᠭᠤᠵᠢᠪᠠᠯ ᠬᠥᠪᠴᠢᠷᠬᠡᠢ ᠶᠢᠨ ᠲᠠᠭᠠᠷᠢᠳᠠᠰᠤ᠂ ᠶᠡᠷᠦᠩᠬᠡᠢ ᠰᠠᠪᠠ ᠪᠦᠷᠬᠦᠪᠴᠢ ᠤᠨᠵᠢᠬᠤ ᠰᠡᠮᠡᠵᠡ ᠤᠨᠵᠢᠬᠤ ᠵᠡᠷᠭᠡ ᠬᠦᠨᠳᠦᠷᠡᠯ ᠦᠳ ᠪᠣᠯᠭᠣᠮᠵᠢ ᠦᠭᠡᠢ ᠵᠠᠰᠠᠯᠭᠠ ᠠᠴᠠ ᠡᠭᠦᠰᠴᠦ ᠪᠣᠯᠳᠠᠭ᠃
ᠮᠥᠨ ᠶᠠᠩᠵᠤ ᠪᠦᠷᠢ ᠶᠢᠨ ᠪᠣᠬᠢᠷᠳᠠᠯᠭᠠ ᠠᠴᠠ ᠪᠣᠯᠵᠤ ᠪᠤᠭᠯᠠᠬᠤ ᠦᠷᠪᠢᠰᠦᠯ ᠦᠳ ᠡᠭᠦᠰᠦᠨ ᠬᠦᠨᠳᠦᠷᠡᠯ ᠪᠤᠢ ᠪᠣᠯᠭᠠᠨᠠ᠃ ᠮᠠᠯ ᠢ ᠬᠥᠩᠭᠡᠯᠡᠭᠰᠡᠨ ᠦ ᠳᠠᠷᠠᠭᠠ ᠢᠳᠡᠭᠡᠲᠦ ᠦᠷᠪᠢᠰᠦᠯ ᠡᠭᠦᠰᠪᠡᠯ ᠰᠢᠷᠬᠠᠨ ᠤ ᠢᠳᠡᠭᠡ ᠶᠢ ᠭᠣᠭᠣᠵᠢᠭᠤᠯᠵᠤ ᠭᠠᠷᠭᠠᠬᠤ ᠨᠢ ᠬᠠᠮᠤᠭ ᠤᠨ ᠲᠤᠭᠤᠰᠢᠲᠠᠢ ᠡᠮᠴᠢᠯᠡᠭᠡ ᠪᠣᠯᠤᠨᠠ᠃ ᠴᠢᠰᠤ ᠭᠤᠭᠤᠵᠢᠵᠤ ᠳᠠᠬᠢᠨ ᠰᠠᠪᠰᠠᠯᠭᠠᠳᠠᠬᠤ ᠴᠢᠰᠤᠨ ᠤ ᠰᠤᠳᠠᠰᠤ ᠶᠢ ᠣᠯᠵᠤ ᠪᠣᠭᠣᠬᠤ ᠵᠡᠷᠭᠡ ᠪᠡᠷ ᠲᠣᠭᠲᠠᠭᠠᠵᠤ ᠪᠣᠯᠤᠨᠠ᠃ ᠰᠡᠭᠦᠯ ᠤᠨ ᠦᠰᠦ ᠶᠢ ᠰᠦᠯᠵᠢᠵᠦ ᠰᠢᠷᠬᠠ ᠲᠠᠢ ᠬᠡᠰᠡᠭ ᠢ ᠬᠢᠯᠭᠠᠰᠤ ᠬᠠᠳᠬᠠᠬᠤ ᠠᠴᠠ ᠬᠠᠮᠠᠭᠠᠯᠠᠬᠤ᠂ ᠰᠡᠭᠦᠯ ᠰᠡᠬᠦᠵᠦ ᠤᠶᠠᠪᠠᠯ ᠴᠢᠰᠤ ᠲᠣᠭᠲᠠᠬᠤ ᠤᠳᠠᠭᠠ ᠴᠤ ᠪᠠᠶᠢᠳᠠᠭ᠃
ᠥᠩᠭᠡᠯᠡᠭᠰᠡᠨ ᠮᠠᠯ ᠳᠤ ᠰᠤᠮᠤ ᠪᠠᠷᠢᠭᠠᠳᠠ ᠶᠢᠨ ᠮᠠᠯ ᠡᠮᠨᠡᠯᠭᠡ ᠶᠢᠨ ᠪᠠᠶᠢᠭᠤᠯᠭᠠ ᠬᠢᠨᠠᠯᠲᠠ ᠲᠠᠯᠪᠢᠵᠤ ᠮᠠᠯᠴᠢᠨ ᠳᠤ ᠵᠣᠬᠢᠬᠤ ᠡᠭᠦᠷᠭᠡ ᠲᠣᠨᠣᠭ ᠬᠡᠷᠡᠭᠯᠡᠯ ᠢ ᠲᠣᠬᠢᠷᠠᠭᠤᠯᠬᠤ ᠳᠤ ᠲᠤᠷᠰᠢᠯᠭᠠ ᠳᠠᠳᠤᠯᠭᠠ ᠴᠢᠬᠤᠯᠠ ᠥᠭᠴᠦ ᠪᠠᠶᠢᠬᠤ ᠵᠠᠷᠴᠢᠮ ᠲᠠᠢ᠃ ᠠᠷᠢᠭᠤᠨ ᠴᠡᠪᠡᠷ ᠦᠨ ᠱᠠᠭᠠᠷᠳᠠᠯᠭᠠ ᠬᠠᠩᠭᠠᠭᠠ ᠦᠭᠡᠢ ᠪᠣᠬᠢᠷ ᠠᠵᠢᠯᠯᠠᠭᠰᠠᠨ ᠵᠠᠰᠠᠯᠭᠠ ᠶᠢᠨ ᠪᠠᠭᠠᠵᠢ ᠬᠡᠷᠡᠭᠯᠡᠯ ᠦᠨ ᠠᠷᠢᠭᠤᠨ ᠴᠡᠪᠡᠷ ᠢ ᠰᠠᠬᠢᠵᠤ ᠠᠵᠢᠯᠯᠠᠭᠠ ᠦᠭᠡᠢ ᠡᠴᠡ ᠬᠦᠨᠳᠦᠷᠡᠯ ᠭᠠᠷᠴᠤ ᠪᠣᠯᠬᠤ ᠦᠵᠡᠭᠳᠡᠯ ᠣᠯᠠᠨᠲᠠ ᠲᠣᠬᠢᠶᠠᠯᠳᠤᠨᠠ᠃
ᠬᠥᠩᠭᠡᠯᠡᠭᠰᠡᠨ ᠦ ᠳᠠᠷᠠᠭᠠ 14-20 ᠬᠣᠨᠣᠭ ᠪᠣᠯᠤᠭᠠᠳ ᠦᠷᠢᠶᠡᠨ ᠦ ᠪᠥᠭᠲᠥᠷᠢᠭᠡ ᠭᠠᠷᠭᠠᠬᠤ ᠪᠤᠶᠤ ᠤᠨᠤᠵᠤ ᠡᠳ᠋ᠯᠡᠨᠡ᠃
ᠡᠨᠡ ᠦᠶᠡ ᠳᠦ ᠰᠢᠷᠦᠭᠦᠨ ᠳᠠᠪᠬᠢᠬᠤ᠂ ᠤᠷᠲᠤ ᠰᠤᠷ ᠲᠠᠢ ᠲᠠᠰᠢᠭᠤᠷ ᠢᠶᠠᠷ ᠭᠤᠶᠠᠳᠠᠬᠤ ᠶᠢ ᠴᠡᠭᠡᠷᠯᠡᠬᠦ᠂ ᠬᠣᠶᠢᠭᠤᠷ ᠣᠯᠣᠩ ᠵᠢᠷᠢᠮ ᠴᠢᠩᠭᠠ ᠲᠠᠲᠠᠵᠤ ᠤᠳᠠᠭᠠᠨ ᠪᠠᠶᠢᠯᠭᠠᠬᠤ ᠵᠡᠷᠭᠡ ᠶᠢ ᠠᠩᠬᠠᠷᠬᠤ᠂ ᠤᠰᠤ ᠬᠣᠭᠣᠯᠠ ᠪᠠᠷ ᠳᠤᠲᠠᠭᠠᠵᠤ ᠪᠣᠯᠬᠤ ᠦᠭᠡᠢ᠃
ᠠᠳᠤᠭᠤ ᠶᠢ ᠬᠥᠩᠭᠡᠯᠡᠬᠦ ᠬᠠᠮᠤᠭ ᠤᠨ ᠲᠤᠬᠢᠷᠠᠮᠵᠢᠲᠠᠢ ᠬᠤᠭᠤᠴᠠᠭᠠ ᠬᠠᠪᠤᠷ ᠤᠨ ᠴᠠᠭ᠃ ᠬᠠᠪᠤᠷ ᠠᠳᠤᠭᠤᠨ ᠤ ᠬᠦᠴᠦ ᠲᠠᠷᠭᠤ ᠨᠢᠮᠭᠡᠨ ᠴᠢᠰᠤ ᠪᠠᠭᠠ ᠭᠠᠷᠴᠤ ᠬᠦᠨᠳᠦᠷᠡᠯᠲᠡ ᠪᠠᠭᠠ ᠲᠠᠢ ᠪᠡᠶᠡ ᠨᠢ ᠬᠥᠩᠭᠡᠨ ᠪᠠᠶᠢᠳᠠᠭ ᠦᠶᠡ ᠶᠤᠮ᠃ ᠡᠨᠡ ᠬᠤᠭᠤᠴᠠᠭᠠ ᠶᠢ ᠣᠷᠣᠶᠢᠲᠠᠭᠤᠯᠪᠠᠯ ᠨᠣᠭᠣᠭᠠ ᠢᠳᠡᠵᠦ ᠲᠠᠷᠭᠤᠯᠠᠬᠤ ᠪᠠ ᠬᠣᠷᠣᠬᠠᠢ ᠭᠠᠷᠴᠤ ᠰᠢᠷᠬᠠᠨ ᠳᠤ ᠬᠦᠨᠳᠦᠷᠡᠯᠲᠡᠢ ᠪᠣᠯᠳᠠᠭ᠃
ᠨᠠᠮᠤᠷ ᠤᠨ ᠴᠠᠭ ᠲᠤ ᠬᠥᠩᠭᠡᠯᠡᠭᠰᠡᠨ ᠠᠳᠤᠭᠤ ᠴᠢᠰᠤ ᠶᠡᠬᠡ ᠠᠯᠠᠳᠠᠬᠤ ᠪᠠ ᠡᠴᠡᠵᠦ ᠲᠤᠷᠠᠬᠤ ᠳᠤ ᠪᠠᠨ ᠬᠢᠯᠪᠠᠷᠬᠠᠨ ᠡᠪᠦᠯ ᠡᠳ᠋ᠯᠡᠵᠦ ᠤᠨᠤᠬᠤ ᠳᠤ ᠲᠠᠮᠢᠷ ᠲᠡᠩᠬᠡᠭᠡ ᠮᠠᠭᠤ ᠲᠠᠢ ᠪᠠᠶᠢᠨᠠ᠃
ᠦᠷᠢᠶᠡ ᠶᠢ ᠵᠠᠰᠠᠭᠠᠳ ᠮᠣᠷᠢ ᠭᠡᠵᠦ ᠨᠡᠷᠡᠯᠡᠬᠦ ᠪᠠ ᠮᠣᠷᠢ ᠪᠣᠯ ᠵᠢᠩᠬᠢᠨᠢ ᠤᠨᠤᠯᠭᠠ ᠦ ᠮᠠᠯ ᠪᠥᠭᠡᠳ ᠠᠳᠤᠭᠤᠨ ᠰᠦᠷᠦᠭ ᠲᠦ ᠵᠣᠩᠬᠢᠯᠠᠬᠤ ᠬᠤᠪᠢ ᠶᠢ ᠡᠵᠡᠯᠡᠵᠦ ᠪᠠᠶᠢᠳᠠᠭ ᠶᠤᠮ᠃