ᠠᠳᠤᠭᠤ ᠶᠢ ᠡᠷᠴᠢᠮᠲᠡᠢ ᠥᠰᠬᠡᠬᠦ ᠨᠢᠭᠡ ᠭᠣᠣᠯ ᠠᠰᠠᠭᠤᠳᠠᠯ ᠨᠢ ᠤᠨᠠᠭᠠ ᠶᠢ ᠪᠦᠷᠢᠨ ᠪᠤᠢᠢᠵᠢᠭᠤᠯᠬᠤ ᠶᠠᠪᠤᠳᠠᠯ ᠶᠤᠮ᠃ ᠰᠤᠮᠤ ᠪᠠᠷᠢᠭᠠᠳ ᠠᠴᠠ ᠬᠠᠪᠤᠷ ᠤᠨ ᠤᠯᠠᠷᠢᠯ ᠳᠤ ᠠᠳᠤᠭᠤᠨ ᠰᠦᠷᠦᠭ ᠦᠨ ᠣᠨ ᠳᠤ ᠣᠷᠣᠯᠲᠠ ᠬᠡᠭᠡᠯ ᠬᠠᠮᠠᠭᠠᠯᠠᠯᠲᠠ ᠶᠢᠨ ᠦᠵᠡᠯᠭᠡ ᠶᠠᠪᠤᠭᠤᠯᠵᠤ ᠰᠠᠭᠤᠷᠢ ᠮᠠᠯᠴᠢᠳ ᠲᠤ ᠤᠨᠠᠭᠠ ᠪᠣᠢᠢᠵᠢᠭᠣᠯᠵᠦ ᠳᠠᠭᠠᠭᠠᠯᠭᠠᠪᠤᠷᠢ ᠥᠭᠭᠦᠨᠡ᠃ ᠤᠨᠠᠭᠠ ᠪᠣᠢᠵᠢᠭᠤᠯᠬᠤ ᠳᠤ ᠨᠥᠭᠡᠴᠡ ᠪᠡᠯᠴᠢᠭᠡᠷ᠂ ᠬᠠᠰᠢᠶᠠ ᠰᠠᠷᠠᠪᠴᠢ ᠲᠡᠵᠢᠭᠡᠯ ᠤᠨᠠᠭᠠ ᠶᠢᠨ ᠨᠡᠮᠨᠡᠭᠡ ᠵᠡᠷᠭᠡ ᠶᠢ ᠤᠷᠢᠳᠴᠢᠯᠠᠨ ᠪᠡᠯᠡᠳᠬᠡᠪᠡᠯ ᠵᠣᠬᠢᠨᠠ᠃ ᠲᠡᠵᠢᠭᠡᠬᠦ ᠱᠠᠭᠠᠷᠳᠠᠯᠭᠠᠲᠠᠢ ᠭᠡᠭᠦᠦ ᠳᠦ ᠬᠣᠨᠣᠭ ᠲᠤ 8 ᠺᠢᠯᠣᠭ᠍ᠷᠠᠮ᠂ ᠬᠦᠴᠢᠲᠦ ᠲᠡᠵᠢᠭᠡᠯ 2-3 ᠺᠢᠯᠣᠭ᠍ᠷᠠᠮ ᠥᠭᠬᠦ ᠪᠡᠷ ᠲᠣᠭᠠᠴᠠᠭᠠᠯᠠᠨ ᠪᠡᠯᠡᠳᠦᠨᠡ᠃ ᠤᠨᠠᠭᠠ ᠪᠣᠢᠵᠢᠭᠤᠯᠬᠤ ᠠᠵᠢᠯ ᠮᠠᠨ ᠤ ᠣᠷᠣᠨ ᠳᠤ ᠣᠯᠠᠨ ᠦᠶᠡ ᠶᠢᠨ ᠲᠤᠷᠰᠢ ᠪᠡᠯᠴᠢᠭᠡᠷ ᠲᠦ ᠡᠬᠢᠯᠡᠭᠡᠳ ᠪᠣᠢᠵᠢᠭᠤᠯᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠰᠡᠭᠦᠯ ᠦᠨ ᠦᠶᠡ ᠳᠦ ᠵᠠᠷᠢᠮ ᠲᠡᠷᠢᠭᠦᠨ ᠦ ᠠᠳᠤᠭᠤᠴᠢᠳ ᠭᠡᠭᠦᠦ ᠶᠢ ᠬᠠᠰᠢᠶᠠᠨ ᠳᠤ ᠲᠥᠯᠯᠡᠭᠦᠯᠦᠨ ᠤᠨᠠᠭᠠ ᠶᠢ ᠪᠦᠷᠢᠨ ᠪᠣᠢᠵᠢᠭᠤᠯᠵᠤ ᠦᠷᠡ ᠳ᠋ᠦᠩ ᠳᠦ ᠬᠦᠷᠴᠦ ᠪᠠᠢᠭᠠ ᠶᠤᠮ᠃ ᠤᠨᠠᠭᠠ ᠶᠢ ᠬᠦᠯᠢᠶᠡᠨ ᠠᠪᠬᠤ ᠳᠤ ᠡᠵᠡᠨ ᠦ ᠲᠤᠰᠠᠯᠠᠯᠴᠠᠭᠠ ᠪᠠᠭᠠ ᠱᠠᠭᠠᠷᠳᠠᠵᠤ ᠪᠠᠢᠭᠠ ᠪᠣᠯᠪᠠᠴᠤ ᠭᠠᠷᠳᠠᠨ ᠪᠣᠢᠵᠢᠭᠤᠯᠬᠤ ᠱᠠᠭᠠᠷᠳᠠᠯᠭᠠ ᠠᠶᠠᠨᠳᠠᠭᠠᠨ ᠭᠠᠷᠳᠠᠭ ᠶᠤᠮ᠃ ᠢᠯᠠᠩᠭᠤᠶᠠ ᠪᠠᠢᠢᠳᠠᠰᠤᠨ ᠭᠡᠭᠦᠦ ᠶᠢ ᠵᠠᠪᠠᠯ ᠭᠠᠳᠠᠨᠠ ᠪᠠᠨ ᠲᠥᠯᠯᠡᠭᠦᠯᠦᠨ ᠤᠨᠠᠭᠠ ᠶᠢ ᠨᠢ ᠪᠣᠢᠵᠢᠭᠤᠯᠬᠤ ᠱᠠᠭᠠᠷᠳᠠᠯᠭᠠ ᠲᠠᠢ ᠃ ᠭᠡᠭᠦᠦ ᠬᠡᠭᠡᠯᠲᠦᠭᠦᠯᠭᠡ ᠶᠢᠨ ᠵᠦᠷᠨᠠᠯ ᠢ ᠨᠠᠷᠢᠨ ᠰᠠᠢᠢᠨ ᠬᠥᠲᠥᠯᠵᠦ ᠰᠡᠭᠦᠯᠴᠢ ᠶᠢᠨ ᠤᠳᠠᠭᠠ ᠠᠵᠢᠷᠭᠠ ᠭᠢᠰᠬᠢᠵᠦ ᠬᠡᠭᠡᠯ ᠠᠪᠤᠭᠰᠠᠨ ᠠᠴᠠ ᠬᠤᠢᠢᠰᠢ ᠳᠤᠮᠳᠠᠴᠢ ᠪᠠᠷ ᠬᠡᠭᠡᠯ ᠢᠶᠡᠨ 340 ᠬᠣᠨᠣᠭ ᠲᠡᠭᠡᠭᠡᠬᠦ ᠪᠣᠯᠪᠠᠴᠤ ᠴᠥᠭᠡᠨ ᠬᠣᠨᠣᠭ ᠤᠨ ᠬᠡᠯᠪᠡᠯᠵᠡᠯ ᠲᠡᠢ ᠤᠨᠠᠭᠠᠯᠠᠳᠠᠭ ᠃ ᠲᠥᠯᠯᠡᠬᠦ ᠳᠥᠬᠥᠭᠰᠡᠨ ᠭᠡᠭᠦᠦ ᠶᠢᠨ ᠬᠥᠬᠥ ᠶᠢᠨ ᠲᠣᠪᠴᠢ ᠨᠢ ᠲᠣᠮᠣᠷᠠᠵᠤ᠂ ᠳᠡᠯᠡᠩ ᠨᠢ ᠠᠷᠤ ᠪᠠᠷ ᠢᠶᠠᠨ ᠬᠠᠷᠠᠭᠳᠠᠬᠤ᠂ ᠣᠢᠢᠷᠠ ᠣᠢᠢᠷᠠᠬᠠᠨ ᠰᠢᠭᠡᠵᠦ᠂ ᠬᠡᠪᠲᠡᠵᠦ ᠪᠣᠰᠬᠤ᠂ ᠭᠡᠳᠡᠰᠦ ᠪᠡᠨ ᠬᠠᠭᠠᠷᠢᠵᠤ ᠬᠠᠷᠠᠬᠤ᠂ ᠰᠦᠷᠦᠭ ᠢᠶᠡᠨ ᠵᠠᠬᠠᠳᠠᠨ ᠵᠣᠭᠰᠣᠬᠤ᠂ ᠪᠥᠭᠰᠡ ᠡᠴᠡ ᠨᠢ ᠰᠠᠯᠢᠰᠤ ᠭᠠᠷᠬᠤ ᠵᠡᠷᠭᠡ ᠰᠢᠨᠵᠢ ᠦᠵᠡᠭᠦᠯᠦᠨᠡ᠃ ᠢᠢ᠌ᠮᠦ ᠳᠦ ᠬᠡᠭᠡᠯᠲᠦᠭᠦᠯᠭᠡ ᠶᠢᠨ ᠡᠳᠦᠷ ᠬᠤᠭᠤᠴᠠᠭᠠ ᠂ ᠭᠠᠳᠠᠨᠠᠬᠢ ᠰᠢᠨᠵᠢ ᠲᠡᠮᠳᠡᠭ ᠢᠶᠡᠷ ᠨᠢ ᠦᠵᠡᠵᠦ ᠲᠥᠯᠯᠡᠬᠦ ᠳᠥᠬᠥᠭᠰᠡᠨ ᠭᠡᠭᠦᠦ ᠶᠢ ᠰᠦᠷᠦᠭ ᠡᠴᠡ ᠢᠯᠭᠠᠨ ᠭᠠᠳᠠᠨᠠ ᠪᠠᠨ ᠲᠡᠵᠢᠭᠡᠵᠦ ᠮᠠᠯᠯᠠᠨ ᠲᠥᠯᠯᠡᠭᠦᠯᠦᠨᠡ᠃ ᠭᠡᠭᠦᠦ᠂ ᠠᠳᠤᠭᠤ ᠵᠣᠭᠰᠣᠬᠤ ᠦᠶᠡ ᠪᠠᠷ ᠦᠳᠡᠰᠢ ᠶᠢᠨ ᠪᠦᠷᠦᠩᠬᠡᠢ᠂ ᠦᠦᠷ ᠦᠨ ᠬᠠᠷᠠᠩᠭᠤᠢ ᠪᠠᠷ ᠶᠡᠬᠡᠪᠴᠢᠯᠡᠨ ᠤᠨᠠᠭᠠᠯᠠᠳᠠᠭ᠃
ᠭᠡᠭᠦᠦ ᠶᠢᠨ ᠬᠡᠪ ᠦᠨ ᠤᠨᠠᠭᠠᠯᠠᠯᠲᠠ 20-40 ᠮᠢᠨᠦ᠋ᠲ ᠲᠤ ᠪᠠᠭᠲᠠᠨᠠ᠃ ᠡᠨᠡ ᠬᠤᠭᠤᠴᠠᠭᠠᠨ ᠳᠤ ᠤᠨᠠᠭᠠᠯᠠᠬᠤ ᠦᠭᠡᠢ ᠪᠣᠯ ᠬᠡᠪᠲᠡᠷᠢ ᠪᠠᠢᠢᠷᠢ ᠨᠥᠬᠥᠴᠡᠯ ᠢ ᠥᠭᠡᠷᠡᠴᠢᠯᠡᠨ ᠴᠠᠭ ᠣᠷᠴᠢᠮ ᠬᠠᠷᠠᠭᠠᠳ ᠲᠤᠷᠰᠢᠯᠭᠠᠲᠠᠢ ᠮᠠᠯᠴᠢᠨ᠂ ᠮᠡᠷᠭᠡᠵᠢᠯᠲᠡᠨ ᠦ ᠣᠷᠣᠯᠴᠠᠭᠠ ᠲᠠᠢ ᠭᠠᠷᠳᠠᠨ ᠠᠪᠬᠤ᠂ ᠰᠠᠪᠠ ᠠᠭᠰᠢᠯᠲᠠ ᠶᠢ ᠰᠠᠢᠵᠢᠷᠠᠭᠤᠯᠬᠤ ᠦᠢᠯᠡᠴᠢᠯᠡᠭᠡ ᠲᠡᠢ ᠡᠮ ᠲᠠᠷᠢᠯᠭᠠ ᠬᠡᠷᠡᠭᠯᠡᠨᠡ᠃ ᠤᠨᠠᠭᠠ ᠡᠬᠡ ᠡᠴᠡ ᠭᠠᠷᠬᠤ ᠳᠠᠭᠠᠨ ᠬᠠᠯᠢᠰᠤ ᠪᠠᠷ ᠬᠤᠴᠢᠭᠳᠠᠵᠤ ᠭᠠᠷᠳᠠᠭ ᠨᠢ ᠵᠠᠷᠢᠮ ᠳᠠᠭᠠᠨ ᠤᠨᠠᠭᠠ ᠰᠠᠯᠢᠰᠤ ᠪᠠᠨ ᠵᠠᠯᠭᠢᠵᠤ ᠪᠦᠲᠡᠵᠦ ᠦᠬᠦᠵᠦ ᠪᠣᠯᠣᠮᠵᠢ ᠲᠠᠢ ᠲᠤᠯᠠ ᠰᠠᠯᠢᠰᠤ ᠶᠢ ᠴᠡᠪᠡᠷᠯᠡᠨ ᠦᠰᠦ ᠶᠢ ᠬᠠᠲᠠᠭᠠᠭᠰᠠᠨ ᠤ ᠳᠠᠷᠠᠭᠠ 40 ᠮᠢᠨᠦ᠋ᠲ ᠲᠤ ᠪᠠᠭᠲᠠᠭᠠᠵᠤ ᠬᠥᠬᠥ ᠶᠢᠨ ᠪᠥᠭᠯᠡᠭᠡ ᠶᠢ ᠭᠠᠷᠭᠠᠵᠤ᠂ ᠰᠦᠯᠢᠭ ᠪᠠᠢᠢᠳᠠᠯ ᠢ ᠰᠢᠯᠭᠠᠵᠤ ᠡᠬᠡ ᠶᠢᠨ ᠤᠭᠤᠷᠠᠭ ᠰᠦᠨ ᠢ ᠴᠠᠳᠲᠠᠯᠠ ᠬᠥᠬᠥᠭᠦᠯᠦᠨᠡ᠃ ᠨᠢᠯᠬᠠ ᠤᠨᠠᠭᠠ ᠶᠢ ᠲᠡᠩᠴᠡᠵᠦ ᠡᠬᠡ ᠶᠢᠨ ᠢᠶᠡᠨ ᠤᠭᠤᠷᠠᠭ ᠢ ᠬᠥᠬᠥᠭᠰᠡᠨ ᠦ ᠳᠠᠷᠠᠭᠠ ᠠᠳᠤᠭᠤᠴᠢᠨ ᠬᠦᠮᠦᠨ ᠤ ᠴᠢᠬᠤᠯᠠ ᠠᠩᠬᠠᠷᠬᠤ ᠵᠦᠢᠯ ᠪᠣᠯ ᠤᠨᠠᠭᠠ ᠶᠢᠨ ᠠᠩᠬᠠᠨ ᠤ ᠵᠤᠩᠭᠠᠭ ᠵᠣᠬᠢᠬᠤ ᠬᠤᠭᠤᠴᠠᠭᠠᠨ ᠳᠠᠭᠠᠨ ᠪᠦᠷᠢᠨ ᠭᠠᠷᠤᠭᠰᠠᠨ ᠡᠰᠡᠬᠦ ᠶᠢ ᠰᠢᠯᠭᠠᠨᠠ᠃ ᠤᠨᠠᠭᠠ ᠶᠢᠨ ᠵᠤᠩᠭᠠᠭ ᠭᠠᠷᠬᠤ ᠦᠭᠡᠢ ᠪᠠᠢᠪᠠᠯ ᠪᠤᠷᠭᠤᠢ ᠲᠠᠯᠪᠢᠵᠤ ᠭᠠᠷᠭᠠᠨᠠ᠃ ᠭᠡᠭᠦᠦ ᠶᠢ ᠤᠨᠠᠭᠠᠯᠠᠬᠤ ᠦᠶᠡ ᠳᠦ ᠠᠳᠤᠭᠤ ᠶᠢ ᠬᠠᠷᠢᠭᠤᠯᠤᠭᠠ ᠮᠠᠨᠠᠭᠠ ᠦᠭᠡᠢ ᠪᠠᠢᠯᠭᠠᠪᠠᠯ ᠭᠠᠷᠤᠭᠰᠠᠨ ᠤᠨᠠᠭᠠ ᠪᠦᠲᠡᠬᠦ᠂ ᠰᠤᠯᠠ ᠳᠣᠷᠣᠢ ᠤᠨᠠᠭᠠ ᠭᠠᠷᠴᠤ ᠡᠬᠡ ᠶᠢ ᠪᠡᠨ ᠬᠥᠬᠥᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠬᠤ᠂ ᠦᠷᠢᠶᠡ ᠠᠵᠢᠷᠭᠠ ᠤᠨᠠᠭᠠ ᠶᠢ ᠪᠠᠷᠢᠬᠤ ᠪᠤᠶᠤ ᠬᠠᠶᠠᠭᠤᠯᠵᠤ ᠡᠬᠡ ᠶᠢ ᠨᠢ ᠬᠤᠷᠢᠶᠠᠵᠤ᠂ ᠬᠥᠭᠡᠭᠡᠵᠦ ᠶᠠᠪᠤᠬᠤ᠂ ᠭᠡᠭᠦᠦ ᠢᠵᠢᠯᠢ ᠶᠢᠨ ᠢᠶᠡᠨ ᠬᠤᠢᠢᠨᠠ ᠠᠴᠠ ᠤᠨᠠᠭᠠ ᠬᠠᠶᠠᠵᠤ ᠶᠠᠪᠤᠬᠤ᠂ ᠪᠠᠢᠢᠳᠠᠰᠤᠨ ᠭᠡᠭᠦᠦ ᠤᠨᠠᠭᠠ ᠭᠣᠯᠣᠬᠤ᠂ ᠬᠥᠬᠥᠭᠦᠯᠬᠦ ᠦᠭᠡᠢ ᠪᠠᠢᠢᠬᠤ ᠵᠡᠷᠭᠡ ᠣᠰᠣᠯ ᠭᠠᠷᠳᠠᠭ ᠢ ᠣᠨᠴᠣᠭᠤᠢᠯᠠᠨ ᠠᠩᠬᠠᠷᠴᠤ ᠪᠠᠢᠢᠩᠭᠤ ᠶᠢᠨ ᠬᠠᠷᠢᠭᠤᠯᠤᠯᠤᠭᠠ ᠮᠠᠯᠯᠠᠭᠠ ᠲᠠᠢ ᠪᠠᠢᠯᠭᠠᠪᠠᠯ ᠵᠣᠬᠢᠨᠠ᠃ ᠬᠠᠪᠤᠷ ᠤᠨ ᠤᠯᠠᠷᠢᠯ ᠳᠤ ᠭᠡᠨᠡᠳᠲᠡ ᠶᠢᠨ ᠰᠢᠭᠤᠷᠭᠠ ᠴᠠᠰᠤᠨ ᠢᠶᠠᠷ ᠠᠳᠤᠭᠤ ᠤᠷᠤᠭᠤᠳᠠᠵᠤ ᠨᠢᠯᠬᠠ ᠤᠨᠠᠭᠠ ᠡᠬᠡ ᠡᠴᠡ ᠪᠡᠨ ᠲᠥᠭᠡᠷᠢᠯᠳᠦᠬᠦ᠂ ᠣᠰᠣᠭᠣᠬᠤ ᠵᠡᠷᠭᠡ ᠪᠡᠷ ᠣᠯᠠᠨ ᠤᠨᠠᠭᠠ ᠣᠰᠣᠯᠳᠠᠳᠠᠭ ᠶᠠᠪᠤᠳᠠᠯ ᠢ ᠵᠣᠭᠰᠣᠭᠠᠬᠤ ᠭᠣᠣᠯ ᠠᠷᠭᠠ ᠨᠢ ᠪᠣᠢᠵᠢᠭᠤᠯᠬᠤ᠂ ᠤᠨᠠᠭᠠ ᠪᠠᠨ ᠨᠡᠮᠨᠡᠵᠦ ᠠᠳᠤᠭᠤ ᠶᠢ ᠤᠷᠤᠭᠤᠳᠠᠭᠤᠯᠬᠤ ᠦᠭᠡᠢ ᠪᠠᠢᠢᠬᠤ ᠶᠠᠪᠤᠳᠠᠯ ᠶᠤᠮ᠃ ᠠᠳᠤᠭᠤ ᠡᠳᠦᠷᠵᠢᠨ ᠰᠥᠨᠢᠵᠢᠨ ᠢᠳᠡᠰᠢᠯᠡᠬᠦ ᠪᠣᠯᠪᠠᠴᠤ ᠮᠠᠯᠯᠠᠭᠠ ᠨᠢ ᠲᠣᠬᠢᠷᠠᠵᠤ ᠪᠠᠢᠢᠪᠠᠯ ᠦᠳᠡᠰᠢ ᠶᠢᠨ ᠪᠦᠷᠦᠩᠬᠦᠢ᠂ ᠦᠦᠷ ᠦᠨ ᠬᠠᠷᠠᠩᠭᠤᠢ ᠦᠳᠡ ᠬᠡᠯᠪᠡᠢᠢᠬᠦ ᠦᠶᠡ ᠳᠦ ᠵᠣᠭᠰᠣᠵᠤ ᠠᠮᠠᠷᠠᠨ ᠲᠡᠵᠢᠭᠡᠯ ᠢᠶᠡᠨ ᠰᠢᠩᠭᠡᠭᠡᠳᠡᠭ᠃ ᠡᠨᠡ ᠦᠶᠡ ᠳᠦ ᠤᠨᠠᠭᠠ ᠠᠳᠤᠭᠤᠨ ᠤ ᠨᠥᠮᠥᠷᠢ ᠢᠯᠴᠢ ᠳᠦ ᠵᠣᠭᠰᠣᠵᠤ ᠳᠤᠯᠠᠭᠠᠴᠠᠨᠠ᠃ ᠡᠬᠡ ᠨᠢ ᠵᠢᠯᠪᠢ ᠮᠠᠭᠤᠲᠠᠢ ᠪᠠ ᠰᠤᠯᠠ ᠳᠣᠷᠣᠢ ᠤᠨᠠᠭᠠ ᠳᠤ ᠨᠡᠮᠡᠭᠳᠡᠯ ᠲᠡᠵᠢᠭᠡᠯ᠂ ᠡᠯᠡᠰᠦᠨ ᠰᠢᠬᠢᠷ ᠲᠡᠢ ᠪᠤᠴᠠᠯᠭᠠᠭᠰᠠᠨ ᠤᠰᠤ ᠪᠠᠷ 20-30 ᠬᠤᠪᠢ ᠰᠢᠩᠭᠡᠯᠡᠭᠰᠡᠨ ᠰᠦᠨ ᠢ ᠡᠬᠢᠨ ᠦ ᠨᠢᠭᠡ ᠰᠠᠷᠠ ᠳᠦ ᠡᠳᠦᠷ ᠲᠦ 2-3 ᠯᠢᠲᠷ ᠢᠶᠡᠷ᠂ ᠬᠣᠶᠠᠳᠠᠬᠢ ᠰᠠᠷᠠ ᠠᠴᠠ 3-4 ᠯᠢᠲᠷ ᠢᠶᠡᠷ ᠪᠠᠭᠰᠤᠷᠤᠮᠠᠯ ᠪᠠ ᠬᠦᠴᠢᠲᠦ ᠲᠡᠵᠢᠭᠡᠯ ᠢ ᠴᠢᠭᠢᠭᠯᠡᠨ ᠳᠡᠪᠲᠦᠭᠡᠵᠦ᠂ ᠰᠠᠢᠢᠨ ᠴᠢᠨᠠᠷ ᠤᠨ ᠡᠪᠡᠰᠦ ᠲᠡᠢ ᠬᠣᠯᠢᠵᠤ 0.5-1.0 ᠺᠢᠯᠣᠭ᠍ᠷᠠᠮ ᠢᠶᠠᠷ ᠪᠣᠳᠣᠵᠤ ᠬᠣᠨᠣᠭ ᠲᠤ 3 ᠬᠤᠪᠢᠶᠠᠵᠤ ᠥᠭᠴᠦ ᠲᠡᠵᠢᠭᠡᠨᠡ᠃
ᠲᠡᠵᠢᠭᠡᠭᠳᠡᠬᠦ ᠱᠠᠭᠠᠷᠳᠠᠯᠭᠠ ᠲᠠᠢ ᠤᠨᠠᠭᠠ ᠶᠢᠨ ᠡᠬᠡ ᠶᠢᠨ ᠨᠢ ᠲᠡᠵᠢᠭᠡᠯᠯᠢᠭ ᠠᠷᠠᠴᠢᠯᠠᠭᠠ ᠶᠢ ᠰᠠᠢᠢᠵᠢᠷᠠᠭᠤᠯᠵᠤ᠂ ᠰᠦᠨ ᠰᠢᠮᠡ ᠶᠢ ᠨᠢ ᠨᠡᠮᠡᠭᠳᠡᠭᠦᠯᠬᠦ᠂ ᠬᠤᠰᠠᠷᠠᠩ ᠪᠠ ᠤᠨᠠᠭᠠᠯᠠᠭᠰᠠᠨ ᠭᠡᠭᠦᠦ ᠳᠦ ᠲᠡᠯᠯᠡᠵᠦ ᠵᠠᠢᠢᠳᠠᠭᠤᠯᠵᠤ ᠪᠤᠢᠢᠵᠢᠭᠤᠯᠬᠤ ᠨᠢ ᠳᠠᠩ ᠨᠡᠮᠡᠭᠳᠡᠯ ᠲᠡᠵᠢᠭᠡᠯ ᠥᠭᠬᠦ ᠡᠴᠡ ᠢᠯᠡᠭᠦᠦ ᠠᠰᠢᠭᠲᠠᠢ᠃ ᠤᠨᠠᠭᠠ ᠶᠢᠨ ᠬᠥᠬᠥᠭᠦᠯ ᠦᠶᠡ 7-8 ᠰᠠᠷᠠ ᠣᠷᠴᠢᠮ ᠦᠷᠭᠦᠯᠵᠢᠯᠡᠬᠦ ᠪᠣᠯᠪᠠᠴᠤ ᠰᠠᠷᠠ ᠶᠢᠨ ᠥᠰᠥᠯᠲᠡ ᠲᠡᠢ ᠦᠶᠡ ᠡᠴᠡ ᠡᠪᠡᠰᠦᠨ ᠲᠡᠵᠢᠭᠡᠯ ᠳᠦ ᠣᠷᠣᠵᠤ ᠤᠯᠠᠮ ᠢᠶᠠᠷ ᠣᠨ ᠤ ᠡᠴᠦᠰ ᠢᠶᠡᠷ ᠳᠠᠩ ᠡᠪᠡᠰᠦᠨ ᠲᠡᠵᠢᠭᠡᠯ ᠢᠶᠡᠷ ᠬᠣᠭᠣᠯᠠᠯᠠᠳᠠᠭ᠃ ᠤᠨᠠᠭᠠ ᠲᠠᠢ ᠭᠡᠭᠦᠦ ᠶᠢ ᠣᠢᠷᠠ ᠶᠢᠨ ᠡᠯᠪᠡᠭ ᠤᠰᠤᠲᠠᠢ ᠰᠠᠢᠨ ᠪᠡᠯᠴᠢᠭᠡᠷ ᠲᠦ ᠮᠠᠯᠯᠠᠵᠤ ᠤᠨᠠᠭᠠ ᠶᠢ ᠡᠪᠡᠰᠦ ᠤᠰᠤᠨ ᠳᠤ ᠣᠷᠣᠭᠤᠯᠤᠨᠠ᠃ ᠶᠡᠷᠦᠳᠡ ᠶᠢᠨ ᠥᠰᠥᠯᠲᠡ ᠲᠡᠢ ᠤᠨᠠᠭᠠ ᠠᠩᠬᠠ 28 ᠺᠢᠯᠣᠭ᠍ᠷᠠᠮ ᠠᠮᠢᠳᠤ ᠶᠢᠨ ᠵᠢᠩ ᠲᠡᠢ ᠲᠥᠷᠥᠵᠦ ᠬᠣᠨᠣᠭ ᠲᠤ 0.6-0.8 ᠺᠢᠯᠣᠭ᠍ᠷᠠᠮ ᠢᠶᠠᠷ ᠨᠡᠮᠡᠭᠳᠡᠵᠦ 6 ᠰᠠᠷᠠ ᠶᠢᠨ ᠳᠠᠷᠠᠭᠠ ᠡᠬᠡ ᠶᠢᠨ ᠢᠶᠡᠨ ᠠᠮᠢᠳᠤ ᠶᠢᠨ ᠵᠢᠩ ᠦᠨ 50 ᠬᠤᠪᠢ ᠲᠠᠢ ᠲᠡᠩᠴᠡᠳᠡᠭ᠃ ᠭᠡᠭᠦᠦ ᠲᠡᠩᠬᠡᠷᠡᠵᠦ ᠲᠠᠷᠭᠤ ᠬᠦᠴᠦ ᠨᠢ ᠵᠢᠭᠳᠡᠷᠡᠨ ᠤᠨᠠᠭᠠ ᠡᠬᠡ ᠶᠢᠨ ᠢᠶᠡᠨ ᠰᠦᠨ ᠳᠦ ᠮᠢᠬᠠᠯᠠᠨ ᠪᠤᠢᠢᠵᠢᠵᠦ ᠡᠬᠢᠯᠡᠬᠦ ᠵᠤᠨ ᠤ ᠡᠬᠢᠨ ᠰᠠᠷᠠ ᠶᠢᠨ 15 ᠦ ᠦᠶᠡ ᠡᠴᠡ ᠭᠡᠭᠦᠦ ᠪᠦᠷᠢ ᠶᠢ ᠨᠣᠮᠣᠬᠠᠷᠠᠭᠤᠯᠤᠨ ᠰᠠᠭᠠᠯᠢ ᠳᠤ ᠰᠤᠷᠭᠠᠬᠤ᠂ ᠲᠠᠷᠭᠤ ᠬᠦᠴᠦ ᠶᠢ ᠴᠢᠮᠪᠠᠢᠢᠷᠠᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠪᠦᠬᠦ ᠤᠨᠠᠭᠠ ᠲᠠᠢ ᠭᠡᠭᠦᠦ ᠶᠢ 10 ᠬᠣᠨᠣᠭ ᠢᠶᠠᠷ ᠠᠵᠢᠷᠭᠠ ᠠᠵᠢᠷᠭᠠ ᠪᠠᠷ ᠡᠭᠡᠯᠵᠢᠯᠡᠨ ᠨᠠᠮᠤᠷ ᠨᠣᠭᠣᠭᠠ ᠰᠥᠯ ᠲᠠᠲᠠᠷᠠᠵᠤ ᠢᠷᠡᠬᠦ ᠦᠶᠡ ᠬᠦᠷᠲᠡᠯᠡ ᠪᠠᠷᠢᠵᠤ ᠰᠢᠷᠠᠯᠠᠭᠤᠯᠬᠤ ᠨᠢ ᠠᠰᠢᠭᠲᠠᠢ ᠭᠡᠳᠡᠭ ᠶᠤᠮ᠃ ᠭᠡᠭᠦᠦ ᠶᠢᠨ ᠪᠡᠯᠴᠢᠭᠡᠷ ᠵᠥᠭᠡᠯᠡᠨ ᠬᠥᠷᠥᠰᠦ ᠲᠡᠢ ᠬᠠᠮᠤᠭ ᠤᠨ ᠣᠢᠷᠠ᠂ ᠨᠢᠯᠬᠠ ᠥᠳᠬᠡᠨ ᠨᠣᠭᠣᠭᠠ ᠲᠠᠢ ᠪᠠᠢᠬᠤ ᠶᠢᠨ ᠭᠠᠳᠠᠨᠠ ᠭᠡᠭᠦᠦ ᠶᠢᠨ ᠵᠡᠯᠡ ᠶᠢ ᠵᠦᠯᠭᠡ ᠳᠡᠨᠵᠢ ᠰᠢᠷᠢᠭᠢ ᠪᠦᠬᠦᠢ ᠭᠠᠵᠠᠷ ᠢ ᠰᠣᠩᠭᠣᠵᠤ ᠨᠠᠷᠠᠨ ᠤ ᠡᠰᠡᠷᠭᠦ ᠬᠤᠢᠢᠰᠢ ᠤᠷᠤᠭᠰᠢ ᠲᠠᠲᠠᠵᠤ ᠳᠣᠯᠣᠭᠠ ᠬᠣᠨᠣᠭ ᠲᠤᠲᠤᠮ ᠤᠨᠠᠭᠠ ᠶᠢᠨ ᠵᠡᠯᠡ ᠶᠢ ᠰᠣᠯᠢᠵᠤ ᠪᠠᠢᠳᠠᠭ᠃ ᠭᠡᠭᠦᠦ ᠪᠠᠷᠢᠬᠤ ᠦᠶᠡ ᠳᠦ ᠤᠨᠠᠭᠠ ᠶᠢ ᠨᠠᠷᠠᠰᠢᠬᠤ ᠠᠴᠠ ᠬᠠᠮᠠᠭᠠᠯᠠᠵᠤ ᠡᠳᠦᠷ ᠦᠨ ᠬᠠᠯᠠᠭᠤᠨ ᠳᠤ ᠨᠢᠭᠡ ᠡᠴᠡ ᠳᠣᠷᠣᠭᠰᠢ ᠦᠭᠡᠢ ᠤᠳᠠᠭᠠ ᠲᠣᠯᠣᠭᠠᠢ ᠨᠢᠷᠤᠭᠤ ᠶᠢ ᠤᠰᠤ ᠪᠠᠷ ᠱᠠᠪᠰᠢᠵᠤ᠂ ᠤᠢᠢᠷᠠ ᠤᠢᠢᠷᠠᠬᠠᠨ ᠡᠬᠡ ᠳᠦ ᠨᠢ ᠬᠥᠬᠥᠭᠦᠯᠦᠨᠡ᠃ ᠵᠤᠨ ᠤ ᠬᠠᠯᠠᠭᠤᠨ ᠳᠦ ᠨᠢᠯᠬᠠ ᠤᠨᠠᠭᠠ ᠪᠡᠯᠴᠢᠭᠡᠷ ᠲᠦ ᠤᠨᠲᠠᠵᠤ ᠬᠣᠴᠣᠷᠬᠤ᠂ ᠠᠳᠤᠭᠤ ᠶᠢ ᠭᠡᠨᠡᠳᠲᠡ ᠰᠢᠷᠦᠭᠦᠨ ᠲᠠᠭᠤᠭᠰᠠᠨ ᠠᠴᠠ ᠳᠠᠭᠠᠷᠢᠭᠳᠠᠨ ᠭᠢᠰᠬᠢᠭᠦᠯᠬᠦ ᠵᠡᠷᠭᠡ ᠪᠡᠷ ᠪᠡᠷᠲᠡᠵᠦ ᠭᠡᠮᠲᠦᠵᠦ ᠡᠬᠡ ᠡᠴᠡ ᠪᠡᠨ ᠲᠥᠭᠡᠷᠢᠯᠳᠥᠬᠦ ᠶᠠᠪᠤᠳᠠᠯ ᠭᠠᠷᠳᠠᠭ ᠢ ᠠᠩᠬᠠᠷᠪᠠᠯ ᠵᠣᠬᠢᠨᠠ᠃ ᠤᠨᠠᠭᠠ ᠶᠢ ᠪᠤᠰᠤᠳ ᠮᠠᠯ ᠤᠨ ᠲᠥᠯ ᠲᠡᠢ ᠠᠳᠠᠯᠢ ᠡᠬᠡ ᠡᠴᠡ ᠨᠢ ᠤᠳᠠᠭᠠᠨ ᠬᠤᠭᠤᠴᠠᠭᠠ ᠪᠠᠷ ᠰᠠᠯᠭᠠᠵᠤ ᠪᠣᠯᠬᠤ ᠦᠭᠡᠢ᠂ ᠤᠴᠢᠷ ᠨᠢ ᠤᠨᠠᠭᠠ ᠬᠣᠨᠣᠭ ᠲᠤ ᠳᠤᠮᠳᠠᠴᠢ ᠪᠠᠷ ᠡᠬᠡ ᠶᠢ ᠪᠡᠨ 20-30 ᠤᠳᠠᠭᠠ ᠬᠥᠬᠥᠳᠡᠭ᠃
ᠤᠨᠠᠭᠠ ᠪᠠᠭᠠ ᠪᠠᠭᠠ ᠪᠠᠷ ᠣᠯᠠᠨ ᠤᠳᠠᠭᠠ ᠬᠥᠬᠥᠳᠡᠭ ᠦᠨ ᠤᠴᠢᠷ ᠪᠣᠯ ᠭᠡᠭᠦᠦ ᠶᠢᠨ ᠳᠡᠯᠡᠩ ᠦᠨ ᠪᠠᠭᠲᠠᠭᠠᠮᠵᠢ ᠪᠠᠭᠠ᠂ ᠲᠡᠭᠦᠨ ᠳᠦ ᠰᠦᠨ ᠣᠷᠣᠬᠤ ᠨᠢ ᠲᠦᠷᠭᠡᠨ ᠪᠥᠭᠡᠳ ᠡᠷᠴᠢᠮᠲᠡᠢ ᠶᠠᠪᠤᠭᠳᠠᠳᠠᠭ ᠲᠠᠢ ᠬᠣᠯᠪᠣᠭᠠᠲᠠᠢ᠃ ᠢᠢ᠌ᠮᠦ ᠳᠦ ᠭᠡᠭᠦᠦ ᠪᠠᠷᠢᠵᠤ ᠠᠢᠢᠷᠠᠭ ᠪᠡᠯᠡᠳᠬᠡᠬᠦ ᠦᠶᠡ ᠳᠦ ᠣᠨᠴᠠᠯᠠᠨ ᠠᠩᠬᠠᠷᠴᠤ ᠤᠢᠢᠷᠠ ᠤᠢᠢᠷᠠᠬᠠᠨ ᠬᠥᠬᠥᠭᠦᠯᠵᠦ ᠪᠠᠢᠢᠪᠠᠯ ᠵᠣᠬᠢᠨᠠ᠃ ᠤᠨᠠᠭᠠ ᠪᠠᠷᠢᠭᠰᠠᠨ ᠤ ᠳᠠᠷᠠᠭᠠᠬᠢ ᠬᠣᠨᠣᠭ ᠤᠳ ᠲᠤ ᠶᠡᠬᠡ ᠴᠠᠩᠭᠠᠳᠠᠭ ᠤᠴᠢᠷ ᠵᠡᠯᠡ ᠳᠡᠭᠡᠷᠡ ᠨᠢ ᠤᠰᠤ ᠠᠪᠴᠢᠷᠠᠵᠤ ᠥᠭᠬᠦ ᠳᠦ ᠤᠰᠤᠨ ᠳᠤ ᠠᠮᠠᠷᠬᠠᠨ ᠣᠷᠣᠨᠠ᠃
ᠵᠤᠨ ᠨᠠᠮᠤᠷ ᠤᠨ ᠦᠶᠡ ᠳᠦ ᠤᠨᠠᠭᠠ ᠲᠠᠢ ᠠᠳᠤᠭᠤ ᠶᠢ ᠬᠥᠭᠡᠭᠡᠵᠦ ᠬᠥᠯᠥᠷᠭᠡᠨ ᠪᠡᠯᠴᠢᠭᠡᠷ ᠦᠨ ᠪᠠ ᠮᠠᠯᠯᠠᠭᠠᠨ ᠤ ᠰᠣᠢᠢᠯᠭᠠ ᠠᠮᠠᠷᠠᠯᠲᠠ ᠦᠭᠡᠢ᠂ ᠬᠠᠯᠠᠭᠤᠨ ᠡᠪᠡᠰᠦ ᠬᠤᠵᠢᠷ ᠢᠳᠡᠭᠦᠯᠬᠦ᠂ ᠢᠯᠠᠩᠭᠤᠶᠠ ᠬᠣᠭ ᠤᠨ ᠤᠷᠭᠤᠮᠠᠯ ᠶᠡᠬᠡᠲᠡᠢ ᠭᠠᠵᠠᠷ ᠮᠠᠯᠯᠠᠬᠤ ᠳᠤ ᠠᠳᠤᠭᠤᠨ ᠤ ᠬᠠᠨᠢᠶᠠᠳᠤ᠂ ᠤᠨᠠᠭᠠ ᠶᠢᠨ ᠰᠠᠬᠤᠤ ᠮᠡᠲᠦ ᠡᠪᠡᠳᠴᠢᠨ ᠨᠤᠭᠦᠳ ᠭᠠᠷᠤᠨᠠ᠃ ᠤᠨᠠᠭᠠ ᠪᠤᠢᠢᠵᠢᠵᠦ ᠪᠠᠢᠢᠭᠠ ᠢᠳᠠ ᠦᠶᠡ ᠪᠡᠷ ᠳᠡᠯᠯᠡᠵᠦ ᠬᠥᠭᠡᠪᠦᠷᠢᠯᠡᠬᠦ᠂ ᠦᠵᠡᠯᠭᠡ ᠰᠢᠨᠵᠢᠯᠡᠭᠡ ᠬᠢᠵᠦ ᠠᠳᠤᠭᠤ ᠶᠢ ᠪᠥᠭᠡᠮ ᠢᠶᠡᠷ ᠨᠢ ᠬᠠᠰᠢᠶᠠᠨ ᠳᠤ ᠣᠷᠣᠭᠤᠯᠵᠤ ᠭᠠᠷᠭᠠᠵᠤ ᠰᠢᠬᠠᠬᠤ ᠳᠤ ᠤᠨᠠᠭᠠ ᠪᠡᠷᠲᠡᠵᠦ ᠭᠡᠮᠲᠦᠬᠦ ᠶᠠᠪᠤᠳᠠᠯ ᠭᠠᠷᠬᠤ ᠠᠴᠠ ᠰᠡᠷᠭᠡᠢᠯᠡᠬᠦ ᠬᠡᠷᠡᠭᠲᠡᠢ᠃ ᠤᠨᠠᠭᠠ ᠶᠢ ᠬᠠᠯᠠᠭᠤᠨ ᠨᠠᠷᠠᠨ ᠳᠤ ᠤᠳᠠᠭᠠᠨ ᠤᠶᠠᠵᠤ ᠴᠠᠩᠭᠠᠭᠠᠬᠤ᠂ ᠤᠰᠤᠯᠠᠯᠲᠠ ᠬᠥᠬᠥᠭᠦᠯᠦᠯᠲᠡ ᠶᠢᠨ ᠬᠣᠭᠣᠷᠣᠨᠳᠤ ᠶᠢᠨ ᠵᠠᠢ ᠶᠢ ᠬᠣᠯᠠᠳᠠᠭᠤᠯᠤᠭᠰᠠᠨ ᠠᠴᠠ ᠨᠠᠷᠠᠰᠢᠳᠠᠭ᠃ ᠨᠠᠷᠠᠰᠢᠭᠰᠠᠨ ᠤᠨᠠᠭᠠ ᠤᠭᠤᠬᠢᠯᠠᠨ ᠭᠡᠨᠡᠳᠲᠡ ᠦᠰᠦᠷᠴᠦ ᠤᠢᠢᠴᠢᠨ᠂ ᠪᠣᠰᠬᠤ ᠪᠠᠷ ᠢᠶᠠᠨ ᠭᠤᠢᠢᠪᠢᠨ ᠰᠠᠯᠭᠠᠨᠠᠵᠦ᠂ ᠪᠡᠶᠡ ᠨᠢ ᠬᠥᠯᠥᠷᠡᠵᠦ᠂ ᠰᠢᠳᠦ ᠨᠢ ᠵᠠᠭᠤᠷᠠᠳᠠᠭ᠃ ᠨᠠᠷᠠᠰᠢᠭᠰᠠᠨ ᠤᠨᠠᠭᠠ ᠳᠤ ᠲᠤᠰᠠᠯᠠᠮᠵᠢ ᠦᠵᠡᠭᠦᠯᠬᠦ ᠳ᠋ᠦ ᠪᠡᠨ ᠬᠠᠯᠠᠭᠤᠨ ᠪᠦᠯᠢᠶᠡᠨ ᠤᠰᠤ ᠪᠠᠷ ᠱᠠᠪᠰᠢᠵᠤ ᠨᠡᠮᠨᠡᠨᠡ᠃ ᠬᠦᠨᠳᠦᠷᠡᠭᠰᠡᠨ ᠪᠣᠯ ᠭᠦᠷᠡᠭᠡ ᠡᠴᠡ ᠨᠢ ᠴᠢᠰᠤ ᠠᠪᠤᠨᠠ᠃ ᠡᠰᠡᠪᠡᠯ ᠨᠠᠷᠠᠰᠢᠭᠰᠠᠨ ᠤᠨᠠᠭᠠ ᠶᠢ ᠬᠤᠳᠳᠤᠭ ᠤᠨ ᠬᠦᠢᠲᠡᠨ ᠤᠰᠤ ᠪᠠᠷ ᠴᠡᠴᠡᠷᠡᠲᠡᠯᠡ ᠱᠠᠪᠰᠢᠬᠤ ᠬᠡᠷᠡᠭᠲᠡᠢ᠃ ᠪᠦᠯᠢᠶᠡᠨ ᠤᠰᠤ ᠪᠠᠷ ᠱᠠᠪᠰᠢᠭᠰᠠᠨ ᠪᠣᠯ ᠬᠦᠢᠲᠡᠨ ᠤᠰᠤ ᠪᠠᠷ ᠱᠠᠪᠰᠢᠵᠤ ᠪᠣᠯᠬᠤ ᠦᠭᠡᠢ᠃ ᠤᠨᠠᠭᠠ ᠶᠢ ᠡᠳᠦᠷ ᠪᠦᠷᠢ ᠤᠶᠠᠵᠤ ᠡᠬᠡ ᠶᠢ ᠨᠢ ᠰᠠᠭᠠᠬᠤ ᠳᠤ ᠤᠨᠠᠭᠠ ᠬᠠᠲᠠᠭᠤᠵᠢᠯ ᠦᠵᠡᠵᠦ ᠨᠣᠮᠣᠬᠠᠷᠠᠬᠤ ᠪᠣᠯᠪᠠᠴᠤ ᠥᠰᠥᠯᠲᠡ ᠬᠥᠭᠵᠢᠯᠲᠡ ᠳᠦ ᠨᠢ ᠰᠠᠢᠢᠨ ᠨᠥᠯᠥᠭᠡ ᠦᠵᠡᠭᠦᠯᠵᠦ ᠴᠢᠳᠠᠬᠤ ᠦᠭᠡᠢ᠃ ᠤᠨᠠᠭᠠ ᠶᠢ ᠨᠠᠮᠤᠷ ᠣᠷᠣᠢ ᠪᠣᠯᠲᠠᠯᠠ ᠤᠶᠠᠵᠤ ᠡᠬᠡ ᠶᠢ ᠨᠢ ᠰᠠᠭᠠᠬᠤ ᠳᠤ ᠤᠨᠠᠭᠠ ᠲᠠᠷᠭᠤ ᠬᠦᠴᠦ ᠪᠡᠨ ᠲᠣᠭᠲᠠᠭᠠᠬᠤ ᠪᠣᠯᠪᠠᠴᠤ ᠬᠡᠲᠦ ᠣᠷᠣᠢᠲᠠᠭᠤᠯᠪᠠᠯ ᠮᠠᠭᠤ ᠪᠠᠷ ᠨᠥᠯᠥᠭᠡᠯᠡᠵᠦ ᠣᠨ ᠴᠠᠭ ᠲᠤ ᠵᠦᠳᠡᠷᠡᠬᠦ ᠪᠣᠯᠣᠨᠠ ᠭᠡᠳᠡᠭ ᠢ ᠠᠩᠬᠠᠷᠴᠤ ᠨᠠᠮᠤᠷ ᠤᠨ ᠳᠤᠮᠳᠠ ᠰᠠᠷᠠ ᠶᠢᠨ ᠰᠡᠭᠦᠯᠴᠢ ᠪᠡᠷ ᠲᠠᠯᠪᠢᠬᠤ ᠬᠡᠷᠡᠭᠲᠡᠢ᠃ ᠡᠪᠦᠯ ᠦᠨ ᠴᠠᠰᠤᠲᠠᠢ ᠦᠶᠡ ᠳᠦ ᠤᠨᠠᠭᠠ ᠡᠬᠡ ᠶᠢᠨ ᠢᠶᠡᠨ ᠴᠠᠪᠴᠢᠵᠤ ᠭᠠᠷᠭᠠᠭᠰᠠᠨ ᠡᠪᠡᠰᠦ ᠶᠢ ᠢᠳᠡᠳᠡᠭ ᠤᠴᠢᠷ ᠴᠠᠰᠤ ᠪᠠᠭᠠᠲᠠᠢ ᠥᠨᠳᠥᠷ ᠤᠷᠭᠤᠴᠠ ᠲᠠᠢ ᠪᠡᠯᠴᠢᠭᠡᠷ ᠲᠦ ᠣᠲᠣᠷᠯᠠᠪᠠᠯ ᠵᠣᠬᠢᠨᠠ᠃ ᠤᠨᠠᠭᠠ ᠪᠤᠢᠢᠵᠢᠭᠤᠯᠤᠯᠳᠠ ᠶᠢᠨ ᠲᠠᠯᠠ ᠪᠠᠷ ᠠᠳᠤᠭᠤᠴᠢᠳ ᠤᠨ ᠤᠨᠴᠠᠭᠠᠢ ᠠᠩᠬᠠᠷᠬᠤ ᠵᠦᠢᠯ᠄
1᠃ ᠭᠡᠭᠦᠦ ᠤᠨᠠᠭᠠᠯᠠᠵᠤ ᠪᠠᠢᠢᠭᠠ ᠦᠶᠡ ᠳᠦ ᠥᠷᠯᠥᠭᠡ ᠡᠷᠲᠡ ᠠᠳᠤᠭᠤᠨ ᠳᠡᠭᠡᠷᠡ ᠣᠴᠢᠵᠤ ᠨᠢᠯᠬᠠ ᠤᠨᠠᠭᠠ ᠡᠬᠡ ᠡᠴᠡ ᠪᠡᠨ ᠰᠠᠷᠨᠢᠬᠤ ᠡᠴᠡ ᠬᠠᠮᠠᠭᠠᠯᠠᠵᠤ ᠠᠳᠤᠭᠤ ᠪᠠᠨ ᠪᠠᠢᠢᠩᠭᠤ ᠶᠢᠨ ᠬᠠᠷᠢᠭᠤᠯᠤᠯᠤᠭᠠ ᠮᠠᠨᠠᠭᠠ ᠲᠠᠢ ᠪᠠᠢᠯᠭᠠᠪᠠᠯ ᠵᠣᠬᠢᠨᠠ᠃
2᠃ ᠵᠠᠷᠢᠮ ᠪᠠᠢᠢᠳᠠᠰᠤᠨ ᠭᠡᠭᠦᠦ ᠤᠨᠠᠭᠠ ᠳ᠋ᠦ ᠪᠡᠨ ᠬᠠᠢᠢᠷᠠᠳᠠᠢ ᠪᠠᠢᠭᠰᠠᠨ ᠴᠤ ᠭᠡᠳᠡᠭᠡ ᠨᠢ ᠬᠦᠷᠦᠭᠡᠳ ᠤᠨᠠᠭᠠ ᠪᠠᠨ ᠬᠥᠬᠥᠭᠦᠯᠳᠡᠭ ᠦᠭᠡᠢ ᠡᠴᠡ 1-3 ᠬᠣᠨᠣᠭ ᠥᠯᠪᠡᠷᠴᠦ ᠦᠬᠦᠳᠡᠭ ᠤᠴᠢᠷ ᠠᠩᠬᠠ ᠤᠨᠠᠭᠠᠯᠠᠭᠰᠠᠨ ᠪᠠᠢᠢᠳᠠᠰᠤᠨ ᠭᠡᠭᠦᠦ ᠪᠦᠷᠢ ᠶᠢ ᠴᠢᠳᠦᠷᠯᠡᠵᠦ ᠤᠨᠠᠭᠠ ᠶᠢ ᠨᠢ ᠬᠥᠬᠥᠭᠦᠯᠵᠦ ᠪᠠᠢᠢᠩᠭᠤ ᠶᠢᠨ ᠬᠢᠨᠠᠯᠲᠠ ᠳᠤ ᠪᠠᠢᠯᠭᠠᠬᠤ ᠬᠡᠷᠡᠭᠲᠡᠢ᠃
3᠃ ᠰᠢᠭᠤᠷᠭᠠ ᠰᠢᠭᠤᠷᠬᠤ ᠦᠶᠡ ᠳᠦ ᠠᠳᠤᠭᠤ ᠶᠢ ᠰᠠᠷᠠᠪᠴᠢᠲᠠᠢ ᠬᠠᠰᠢᠶᠠᠨ ᠳᠤ ᠬᠣᠷᠢᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯ ᠠᠳᠤᠭᠤ ᠪᠠᠨ ᠴᠤᠭᠯᠠᠭᠤᠯᠵᠤ ᠤᠰᠤ ᠴᠠᠰᠤ ᠨᠡᠪᠲᠡᠷᠡᠬᠦ ᠦᠭᠡᠢ ᠵᠤᠵᠠᠭᠠᠨ ᠬᠤᠪᠴᠠᠰᠤ᠂ ᠬᠣᠭᠣᠯᠠ ᠬᠦᠨᠡᠰᠦᠨ ᠦ ᠪᠡᠯᠡᠳᠬᠡᠯ ᠲᠡᠢ ᠠᠳᠤᠭᠤ ᠲᠠᠢ ᠪᠠᠨ ᠴᠤᠭ ᠤᠷᠤᠭᠤᠳᠠᠭᠠᠳ ᠰᠢᠭᠤᠷᠭᠠ ᠨᠠᠮᠳᠠᠬᠤ ᠳᠤ ᠠᠳᠤᠭᠤ ᠶᠢ ᠪᠠᠨ ᠴᠤᠪᠤᠭᠤᠯᠬᠤ ᠦᠭᠡᠢ ᠲᠣᠭᠲᠠᠭᠠᠵᠤ ᠬᠠᠷᠢᠭᠤᠯᠤᠨ ᠤᠨᠠᠭᠠ ᠲᠥᠭᠡᠷᠢᠯᠳᠦᠬᠦ ᠡᠴᠡ ᠬᠠᠮᠠᠭᠠᠯᠠᠪᠠᠯ ᠵᠣᠬᠢᠨᠠ᠃ ᠤᠨᠠᠭᠠ ᠡᠬᠡ ᠶᠢ ᠪᠡᠨ ᠳᠠᠭᠠᠭᠠᠳ ᠰᠢᠭᠤᠷᠭᠠ ᠳᠤ ᠠᠯᠵᠠᠬᠤ ᠦᠭᠡᠢ ᠶᠠᠪᠤᠵᠤ ᠴᠢᠳᠠᠳᠠᠭ ᠪᠣᠯᠪᠠᠴᠤ ᠰᠢᠭᠤᠷᠭᠠ ᠶᠢᠨ ᠳᠠᠷᠠᠭᠠ ᠠᠳᠤᠭᠤ ᠡᠷᠭᠢᠬᠦ ᠳᠦ ᠶᠡᠬᠡᠪᠴᠢᠯᠡᠨ ᠤᠨᠲᠠᠵᠤ ᠬᠣᠴᠣᠷᠴᠤ ᠲᠥᠭᠡᠷᠢᠯᠳᠦᠬᠦ ᠶᠠᠪᠤᠳᠠᠯ ᠭᠠᠷᠳᠠᠭ ᠢ ᠠᠩᠬᠠᠷᠴᠤ ᠠᠵᠢᠯᠯᠠᠬᠤ ᠨᠢ ᠵᠦᠢᠲᠡᠢ᠃
4᠃ ᠲᠡᠷᠢᠭᠦᠨ ᠦ ᠠᠳᠤᠭᠤᠴᠢᠳ ᠤᠨ ᠲᠤᠷᠰᠢᠯᠭᠠ ᠪᠠᠷ ᠭᠡᠭᠦᠦ ᠶᠢ ᠬᠠᠰᠢᠶᠠᠨ ᠳᠤ ᠲᠥᠯᠯᠡᠭᠦᠯᠬᠦ ᠠᠷᠭᠠ ᠬᠡᠮᠵᠢᠶᠡ ᠶᠢ ᠨᠥᠭᠡᠴᠡ ᠪᠣᠯᠣᠯᠴᠠᠭᠠ ᠠᠰᠢᠭᠯᠠᠨ ᠬᠢᠪᠡᠯ ᠵᠣᠬᠢᠨᠠ᠃