ᠪᠡᠯᠴᠢᠭᠡᠷ ᠦᠨ ᠠᠳᠤᠭᠤᠨ ᠰᠦᠷᠦᠭ ᠲᠦ ᠬᠡᠭᠡᠯᠲᠦᠭᠦᠯᠭᠡ ᠶᠢᠨ ᠬᠡᠳᠦ ᠬᠡᠳᠦᠨ ᠠᠷᠭᠠ ᠬᠡᠷᠡᠭᠯᠡᠬᠦ ᠪᠥᠭᠡᠳ ᠲᠡᠳᠡᠭᠡᠷ ᠦᠨ ᠠᠯᠢᠨ ᠢ ᠰᠣᠩᠭᠣᠨ ᠠᠪᠬᠤ ᠨᠢ ᠦᠷᠡᠵᠢᠯ ᠦᠨ ᠠᠵᠢᠯ ᠤᠨ ᠴᠢᠭᠯᠡᠯ᠂ ᠵᠣᠷᠢᠯᠲᠠ ᠠᠴᠠ ᠬᠠᠮᠢᠶᠠᠷᠤᠨᠠ᠃ ᠡᠭᠦᠨ ᠳᠦ᠂ ᠪᠡᠯᠴᠢᠭᠡᠷ ᠦᠨ ᠴᠢᠯᠦᠭᠡᠲᠦ ᠪᠣᠯᠣᠨ ᠠᠩᠭᠢᠯᠠᠵᠤ ᠰᠦᠷᠦᠭᠯᠡᠨ ᠬᠠᠰᠢᠶᠠᠯᠠᠨ᠂ ᠭᠠᠷᠳᠠᠨ ᠬᠡᠭᠡᠯᠲᠦᠭᠦᠯᠭᠡ ᠶᠢᠨ ᠠᠷᠭᠠ ᠶᠢ ᠬᠡᠷᠡᠭᠯᠡᠳᠡᠭ᠃
1 ᠪᠡᠯᠴᠢᠭᠡᠷ ᠦᠨ ᠴᠢᠯᠦᠭᠡᠲᠦ ᠬᠡᠭᠡᠯᠲᠦᠭᠦᠯᠭᠡ
ᠡᠨᠡ ᠠᠷᠭᠠ ᠶᠢ ᠵᠥᠪᠬᠡᠨ ᠬᠡᠷᠡᠭᠴᠡᠭᠡᠨ ᠦ ᠠᠳᠤᠭᠤᠨ ᠰᠦᠷᠦᠭ ᠲᠦ ᠬᠡᠷᠡᠭᠯᠡᠨᠡ᠃ ᠭᠡᠬᠦ ᠳ᠋ᠦ ᠪᠡᠨ ᠠᠩᠭᠢᠯᠠᠯ ᠢᠶᠠᠷ 2 ᠠᠴᠠ ᠳᠣᠷᠣᠭᠰᠢ ᠦᠭᠡᠢ ᠠᠩᠭᠢ ᠳᠤ ᠣᠷᠣᠭᠰᠠᠨ ᠠᠵᠢᠷᠭᠠ ᠠᠰᠢᠭᠯᠠᠨᠠ᠃ ᠪᠡᠯᠴᠢᠭᠡᠷ ᠦᠨ ᠴᠢᠯᠦᠭᠡᠲᠦ ᠬᠡᠭᠡᠯᠲᠦᠭᠦᠯᠭᠡ ᠶᠢᠨ ᠦᠶᠡ ᠳᠦ ᠨᠠᠰᠤᠨ ᠤ ᠪᠠᠢᠢᠳᠠᠯ ᠂ ᠠᠵᠢᠷᠭᠠ ᠭᠡᠭᠦᠦ ᠶᠢᠨ ᠲᠥᠷᠥᠯ ᠢ ᠬᠠᠷᠠᠭᠠᠯᠵᠠᠬᠤ ᠨᠢ ᠵᠦᠢᠲᠡᠢ᠃ ᠤᠤᠯ ᠠᠵᠢᠷᠭᠠ ᠶᠢᠨ ᠬᠤᠷᠢᠶᠠᠬᠤ ᠭᠡᠭᠦᠦ ᠶᠢ ᠤᠷᠢᠳᠴᠢᠯᠠᠨ ᠨᠣᠭᠳᠠᠭᠤᠯᠵᠤ ᠭᠡᠭᠦᠦ ᠶᠢ ᠠᠵᠢᠷᠭᠠ ᠳᠤ ᠬᠤᠷᠢᠶᠠᠯᠭᠠᠵᠤ ᠳᠠᠰᠬᠠᠬᠤ ᠬᠡᠷᠡᠭᠲᠡᠢ᠃
ᠨᠢᠭᠡ ᠠᠵᠢᠷᠭᠠ ᠳᠤ 15-20 ᠭᠡᠭᠦᠦ ᠨᠣᠭᠳᠠᠬᠤ ᠪᠠᠷ ᠪᠣᠳᠣᠵᠤ ᠰᠦᠷᠦᠭ ᠲᠦ ᠠᠵᠢᠷᠭᠠ ᠲᠠᠯᠪᠢᠨᠠ᠃ ᠪᠡᠯᠴᠢᠭᠡᠷ ᠦᠨ ᠴᠢᠯᠦᠭᠡᠲᠦ ᠬᠡᠭᠡᠯᠲᠦᠭᠦᠯᠭᠡ ᠶᠢᠨ ᠦᠶᠡ ᠳᠦ ᠶᠠᠮᠠᠷ ᠠᠵᠢᠷᠭᠠ ᠶᠠᠮᠠᠷ ᠭᠡᠭᠦᠦ ᠬᠤᠷᠢᠶᠠᠭᠰᠠᠨ ᠢ ᠠᠳᠤᠭᠤᠴᠢᠳ ᠰᠠᠢᠢᠨ ᠠᠵᠢᠭᠯᠠᠵᠤ ᠪᠦᠷᠢᠳᠬᠡᠵᠦ ᠪᠠᠢᠢᠬᠤ ᠡᠭᠦᠷᠭᠡ ᠲᠡᠢ ᠪᠥᠭᠡᠳ ᠲᠡᠭᠦᠨ ᠦ ᠦᠨᠳᠦᠰᠦᠨ ᠳᠡᠭᠡᠷᠡ ᠬᠡᠭᠡᠯᠲᠦᠭᠦᠯᠭᠡ ᠶᠢᠨ ᠮᠡᠳᠡᠭᠡ ᠶᠢ ᠭᠠᠷᠭᠠᠨᠠ᠃
2 ᠠᠩᠭᠢᠯᠠᠨ ᠰᠦᠷᠦᠭᠯᠡᠵᠦ ᠬᠡᠭᠡᠯᠲᠦᠭᠦᠯᠬᠦ ᠠᠷᠭᠠ
ᠡᠨᠡ ᠠᠷᠭᠠ ᠶᠢ ᠦᠷᠡᠵᠢᠯ ᠦᠨ ᠪᠣᠯᠣᠨ ᠵᠠᠷᠢᠮ ᠬᠡᠷᠡᠭᠴᠡᠭᠡᠨ ᠦ ᠰᠠᠭᠤᠷᠢ ᠳᠤ ᠬᠡᠷᠡᠭᠯᠡᠨᠡ᠃ ᠠᠵᠢᠷᠭᠠ ᠭᠡᠭᠦᠦ ᠶᠢᠨ ᠠᠩᠭᠢᠯᠠᠯᠲᠠ ᠶᠢᠨ ᠮᠠᠲ᠋ᠧᠷᠢᠶᠠᠯ ᠤᠨ ᠦᠨᠳᠦᠰᠦᠨ ᠳᠡᠭᠡᠷᠡ ᠰᠦᠷᠦᠭᠯᠡᠨ ᠠᠩᠭᠢᠯᠠᠵᠤ ᠬᠡᠭᠡᠯᠲᠦᠭᠦᠯᠬᠦ ᠠᠷᠭᠠ ᠶᠢ ᠬᠡᠷᠡᠭᠯᠡᠨᠡ᠃ ᠠᠩᠭᠢᠯᠠᠨ ᠰᠦᠷᠦᠭᠯᠡᠬᠦ ᠬᠡᠭᠡᠯᠲᠦᠭᠦᠯᠭᠡ ᠪᠡᠷ ᠠᠵᠢᠷᠭᠠ ᠭᠡᠭᠦᠦ ᠶᠢ ᠲᠤᠰᠠᠭᠠᠷᠯᠠᠨ ᠰᠠᠭᠤᠷᠢᠯᠠᠵᠤ ᠮᠠᠯᠯᠠᠨᠠ᠃ ᠬᠡᠭᠡᠯᠲᠦᠭᠦᠯᠭᠡ ᠶᠢᠨ ᠡᠨᠡ ᠠᠷᠭᠠ ᠶᠢᠨ ᠦᠶᠡ ᠳᠦ ᠦᠷᠡᠵᠢᠯ ᠦᠨ ᠰᠢᠯᠢᠮᠡᠯ ᠭᠡᠭᠦᠦ ᠶᠢᠨ ᠰᠠᠭᠤᠷᠢ ᠳᠤ ᠰᠢᠯᠢᠮᠡᠯ ᠠᠵᠢᠷᠭᠠ ᠲᠠᠯᠪᠢᠨᠠ᠃ ᠨᠢᠭᠡᠳᠦᠭᠡᠷ ᠠᠩᠭᠢ ᠶᠢᠨ ᠭᠡᠭᠦᠦ ᠳᠦ ᠨᠢᠭᠡᠳᠦᠭᠡᠷ ᠠᠩᠭᠢ ᠶᠢᠨ ᠠᠵᠢᠷᠭᠠ᠂ ᠬᠣᠶᠠᠳᠤᠭᠠᠷ ᠠᠩᠭᠢ ᠶᠢᠨ ᠭᠡᠭᠦᠦ ᠳᠦ ᠨᠢᠭᠡᠳᠦᠭᠡᠷ ᠠᠩᠭᠢ ᠠᠴᠠ ᠳᠤᠷᠤᠭᠰᠢ ᠦᠭᠡᠢ᠂ ᠬᠡᠷᠡᠭᠴᠡᠭᠡᠨ ᠦ ᠰᠠᠭᠤᠷᠢ ᠳᠦ ᠨᠢᠭᠡ ᠪᠤᠶᠤ ᠬᠣᠶᠠᠳᠤᠭᠠᠷ ᠠᠩᠭᠢ ᠳᠤ ᠣᠷᠣᠭᠰᠠᠨ ᠠᠵᠢᠷᠭᠠ ᠲᠠᠯᠪᠢᠨᠠ᠃ ᠠᠩᠬᠠ ᠠᠰᠢᠭᠯᠠᠵᠤ ᠪᠠᠢᠢᠭᠠ ᠵᠠᠯᠠᠭᠤ ᠠᠵᠢᠷᠭᠠ ᠳᠤ ᠣᠷᠣᠭᠠ ᠨᠢ ᠰᠠᠢᠢᠨ ᠣᠷᠣᠭᠰᠠᠨ ᠭᠡᠭᠦᠦ ᠭᠢᠰᠬᠢᠭᠦᠯᠦᠨ ᠤᠤᠯ ᠰᠦᠷᠦᠭ ᠲᠦ ᠨᠢ ᠬᠠᠮᠲᠤ ᠪᠠᠢᠢᠯᠭᠠᠨᠠ᠃ ᠠᠩᠭᠢᠯᠠᠨ ᠰᠦᠷᠦᠭᠯᠡᠬᠦ ᠬᠡᠭᠡᠯᠲᠦᠭᠦᠯᠭᠡ ᠶᠢᠨ ᠦᠶᠡ ᠳᠦ ᠨᠢᠭᠡ ᠠᠵᠢᠷᠭᠠ ᠳᠤ 20-25 ᠭᠡᠭᠦᠦ ᠨᠣᠭᠳᠠᠭᠤᠯᠤᠨᠠ᠃ ᠠᠩᠬᠠ ᠬᠡᠭᠡᠯᠲᠦᠭᠦᠯᠭᠡ ᠳᠦ ᠠᠰᠢᠭᠯᠠᠵᠤ ᠪᠠᠢᠭᠠ ᠭᠡᠭᠦᠦ ᠨᠣᠭᠳᠠᠭᠤᠯᠤᠨᠠ᠃ ᠡᠨᠡ ᠬᠡᠭᠡᠯᠲᠦᠭᠦᠯᠭᠡ ᠶᠢᠨ ᠦᠶᠡ ᠳᠦ ᠠᠵᠢᠷᠭᠠ ᠦᠷᠢᠶᠡ᠂ ᠨᠠᠰᠤ ᠠᠬᠢᠭᠰᠠᠨ ᠠᠵᠢᠷᠭᠠ ᠳᠤ 12-15 ᠭᠡᠭᠦᠦ ᠶᠢ ᠬᠤᠷᠢᠶᠠᠭᠰᠠᠨ ᠠᠵᠢᠷᠭᠠ ᠶᠢᠨ ᠨᠢ ᠬᠠᠮᠲᠤ ᠲᠤᠰ ᠲᠤᠰ ᠲᠤ ᠨᠢ ᠮᠠᠯᠯᠠᠨᠠ᠃ ᠰᠠᠭᠤᠷᠢ ᠨᠤᠭᠤᠳ ᠤᠨ ᠬᠣᠭᠣᠷᠣᠨᠳᠤ 2-3 ᠺᠢᠯᠣᠮᠧᠲᠷ ᠤᠨ ᠵᠠᠢᠢᠳᠠᠢ ᠪᠠᠢᠢᠨᠠ᠃ ᠦᠷᠡᠵᠢᠯ ᠦᠨ ᠴᠢᠨᠠᠷ ᠢᠶᠠᠷ ᠲᠣᠬᠢᠷᠠᠭᠰᠠᠨ ᠨᠥᠭᠡᠴᠡ ᠠᠵᠢᠷᠭᠠ ᠪᠠᠢᠢᠯᠭᠠᠪᠠᠯ ᠵᠣᠬᠢᠨᠠ᠃ ᠬᠡᠷᠪᠡ ᠬᠡᠭᠡᠯᠲᠦᠭᠦᠯᠭᠡ ᠳᠦ ᠠᠰᠢᠭᠯᠠᠵᠤ ᠪᠠᠢᠢᠭᠠ ᠠᠵᠢᠷᠭᠠ ᠶᠠᠮᠠᠷ ᠨᠢᠭᠡᠨ ᠰᠢᠯᠲᠠᠭᠠᠨ ᠢᠶᠠᠷ ᠭᠡᠮᠲᠦᠬᠦ ᠪᠤᠶᠤ ᠬᠠᠷᠠᠢᠢᠯᠳᠠ ᠨᠢ ᠮᠠᠭᠤᠳᠠᠪᠠᠯ ᠲᠡᠭᠦᠨ ᠢ ᠨᠥᠭᠡᠴᠡᠯᠡᠭᠰᠡᠨ ᠠᠵᠢᠷᠭᠠ ᠪᠠᠷ ᠰᠣᠯᠢᠵᠤ ᠬᠡᠭᠡᠯᠲᠦᠭᠦᠯᠭᠡ ᠳᠦ ᠠᠰᠢᠭᠯᠠᠵᠤ ᠪᠠᠢᠢᠭᠰᠠᠨ ᠠᠵᠢᠷᠭᠠ ᠪᠠᠨ ᠨᠥᠭᠡᠴᠡ ᠳᠦ ᠰᠢᠯᠵᠢᠭᠦᠯᠦᠨᠡ᠃ ᠭᠡᠭᠦᠦ ᠶᠢ ᠰᠠᠭᠠᠯᠢ ᠳᠤ ᠠᠰᠢᠭᠯᠠᠵᠤ ᠪᠠᠢᠢᠭᠠ ᠪᠣᠯ ᠠᠵᠢᠷᠭᠠ ᠠᠷᠵᠢᠭᠠ ᠪᠠᠷ ᠨᠢ ᠲᠤᠰᠬᠠᠢ ᠮᠠᠯᠯᠠᠨᠠ᠃
3᠃ ᠬᠠᠰᠢᠶᠠᠯᠠᠨ ᠬᠡᠭᠡᠯᠲᠦᠭᠦᠯᠬᠦ ᠠᠷᠭᠠ
ᠪᠡᠯᠴᠢᠭᠡᠷ ᠦᠨ ᠠᠳᠤᠭᠤᠨ ᠰᠦᠷᠦᠭ ᠲᠦ ᠦᠷᠡᠵᠢᠯ ᠦᠨ ᠠᠵᠢᠯ ᠨᠠᠷᠢᠨ ᠵᠣᠬᠢᠶᠠᠵᠤ ᠪᠠᠢᠭᠠ ᠦᠶᠡ ᠳᠦ ᠬᠠᠰᠢᠶᠠᠯᠠᠨ ᠬᠡᠭᠡᠯᠲᠦᠭᠦᠯᠬᠦ ᠠᠷᠭᠠ ᠶᠢ ᠬᠡᠷᠡᠭᠯᠡᠨᠡ᠃ ᠡᠨᠡ ᠠᠷᠭᠠ ᠶᠢᠨ ᠦᠶᠡ ᠳᠦ ᠵᠥᠪᠬᠡᠨ ᠲᠣᠬᠢᠷᠠᠭᠤᠯᠤᠨ ᠰᠣᠩᠭᠣᠭᠰᠠᠨ ᠠᠵᠢᠷᠭᠠ ᠭᠡᠭᠦᠦ ᠶᠢ ᠨᠡᠢᠯᠡᠭᠦᠯᠦᠨᠡ᠃ ᠬᠠᠰᠢᠶᠠᠯᠠᠨ ᠬᠡᠭᠡᠯᠲᠦᠭᠦᠯᠬᠦ ᠳᠦ ᠭᠡᠭᠦᠦ ᠶᠢ ᠬᠠᠰᠢᠵᠤ ᠲᠡᠳᠡᠭᠡᠷ ᠢ ᠲᠣᠬᠢᠷᠠᠭᠤᠯᠤᠨ ᠰᠣᠩᠭᠣᠭᠰᠠᠨ ᠠᠵᠢᠷᠭᠠ ᠪᠠᠷ ᠭᠢᠰᠬᠢᠭᠦᠯᠦᠨᠡ᠃ ᠠᠵᠢᠷᠭᠠ ᠣᠷᠣᠭᠠᠲᠠᠢ ᠭᠡᠭᠦᠦ ᠶᠢ ᠣᠯᠵᠤ 1-2 ᠤᠳᠠᠭᠠ ᠭᠢᠰᠬᠢᠭᠰᠡᠨ ᠦ ᠳᠠᠷᠠᠭᠠ ᠤᠤᠯ ᠰᠦᠷᠦᠭ ᠢ ᠪᠡᠯᠴᠢᠭᠡᠷ ᠲᠦ ᠭᠠᠷᠭᠠᠨᠠ᠃ ᠬᠠᠰᠢᠶᠠᠯᠠᠨ ᠬᠡᠭᠡᠯᠲᠦᠭᠦᠯᠬᠦ ᠠᠷᠭᠠ ᠶᠢ ᠬᠢᠯᠪᠠᠷᠴᠢᠯᠠᠬᠤ ᠶᠢᠨ ᠲᠤᠯᠠᠳᠠ ᠲᠤᠷᠰᠢᠭᠴᠢ ᠠᠵᠢᠷᠭᠠ ᠪᠠᠷ ᠵᠥᠪᠬᠡᠨ ᠣᠷᠣᠭᠠ ᠨᠢ ᠣᠷᠣᠭᠰᠠᠨ ᠭᠡᠭᠦᠦ ᠶᠢ ᠢᠯᠡᠷᠡᠭᠦᠯᠵᠦ ᠡᠳᠡᠭᠡᠷ ᠭᠡᠭᠦᠦ ᠶᠢ ᠬᠠᠰᠢᠶᠠᠨ ᠳᠤ ᠬᠠᠰᠢᠵᠤ ᠨᠣᠭᠳᠠᠭᠤᠯᠤᠭᠰᠠᠨ ᠠᠵᠢᠷᠭᠠ ᠪᠠᠷ 1-2 ᠤᠳᠠᠭᠠ ᠭᠢᠰᠬᠢᠭᠦᠯᠵᠦ᠂ ᠪᠡᠯᠴᠢᠭᠡᠷ ᠲᠦ ᠭᠠᠷᠭᠠᠨᠠ᠃ ᠬᠠᠰᠢᠶᠠᠯᠠᠨ ᠬᠡᠭᠡᠯᠲᠦᠭᠦᠯᠬᠦ ᠦᠶᠡ ᠳᠦ ᠨᠢᠭᠡ ᠠᠵᠢᠷᠭᠠ ᠳᠤ 25-30 ᠭᠡᠭᠦᠦ ᠨᠣᠭᠳᠠᠭᠤᠯᠤᠨᠠ᠃
4᠃ ᠭᠠᠷᠳᠠᠨ ᠬᠡᠭᠡᠯᠲᠦᠭᠦᠯᠭᠡ
ᠭᠠᠷᠳᠠᠨ ᠬᠡᠭᠡᠯᠲᠦᠭᠦᠯᠭᠡ ᠶᠢ ᠶᠠᠪᠤᠭᠤᠯᠬᠤ ᠳᠤ ᠪᠡᠯᠴᠢᠭᠡᠷ ᠲᠦ ᠲᠤᠷᠰᠢᠭᠴᠢ ᠠᠵᠢᠷᠭᠠ ᠪᠠᠷ ᠣᠷᠣᠭᠠ ᠨᠢ ᠣᠷᠣᠭᠰᠠᠨ ᠭᠡᠭᠦᠦ ᠶᠢ ᠣᠯᠣᠭᠤᠯᠵᠤ᠂ ᠠᠵᠢᠷᠭᠠ ᠳᠦ ᠠᠪᠴᠢᠷᠠᠵᠤ ᠭᠢᠰᠬᠢᠭᠦᠯᠦᠨᠡ᠃ ᠭᠠᠷᠳᠠᠨ ᠬᠡᠭᠡᠯᠲᠦᠭᠦᠯᠭᠡ ᠳᠦ ᠠᠰᠢᠭᠯᠠᠵᠤ ᠪᠠᠢᠢᠭᠠ ᠠᠵᠢᠷᠭᠠ ᠶᠢ ᠡᠳᠦᠷ ᠲᠦ 1-2 ᠤᠳᠠᠭᠠ ᠬᠠᠷᠠᠢᠢᠯᠭᠠᠨᠠ ᠃ ᠭᠠᠷᠳᠠᠨ ᠬᠡᠭᠡᠯᠲᠦᠭᠦᠯᠭᠡ ᠪᠡᠷ ᠨᠢᠭᠡ ᠠᠵᠢᠷᠭᠠ ᠳᠤ 35-40 ᠭᠡᠭᠦᠦ ᠡᠴᠡ ᠳᠡᠭᠡᠭᠰᠢ ᠭᠡᠭᠦᠦ ᠨᠣᠭᠳᠠᠭᠤᠯᠵᠤ ᠪᠣᠯᠣᠨᠠ᠃ ᠭᠡᠭᠦᠦ ᠬᠡᠭᠡᠯᠲᠦᠭᠦᠯᠭᠡ ᠶᠢᠨ ᠳ᠋ᠦᠩ ᠢ ᠰᠠᠭᠤᠷᠢ ᠶᠢᠨ ᠠᠬᠠᠯᠠᠭᠴᠢ ᠨᠠᠷ ᠤᠨ ᠲᠣᠳᠣᠷᠬᠠᠢᠢᠯᠠᠯᠳᠠ ᠶᠢ ᠦᠨᠳᠦᠰᠦᠯᠡᠨ ᠵᠣᠲ᠋ᠧᠭᠨᠢᠭᠴᠢ᠂ ᠮᠠᠯ ᠤᠨ ᠡᠮᠴᠢ ᠨᠠᠷ ᠬᠡᠭᠡᠯ ᠦᠨ ᠰᠢᠯᠭᠠᠯᠲᠠ ᠬᠢᠵᠦ ᠠᠵᠢᠷᠭᠠ ᠭᠡᠭᠦᠦ ᠶᠢᠨ ᠲᠣᠬᠢᠷᠠᠭᠠ ᠶᠢ ᠳᠠᠬᠢᠨ ᠨᠠᠷᠢᠪᠴᠢᠯᠠᠨ ᠦᠵᠡᠵᠦ ᠭᠠᠷᠭᠠᠨᠠ᠃