ᠤᠨᠠᠭᠠ ᠤᠶᠠᠭᠠᠨ ᠳᠤ ᠪᠠᠨ ᠢᠷᠠᠳᠠᠭ ᠮᠠᠯ ᠪᠣᠯᠬᠤ ᠪᠠᠷ ᠪᠥᠬᠡ ᠰᠠᠶᠢᠨ ᠨᠣᠭᠲᠣ ᠴᠢᠭᠲᠠ ᠵᠡᠯᠡ ᠱᠠᠭᠠᠷᠳᠠᠳᠠᠭ᠃ ᠤᠨᠠᠭᠠ ᠤᠶᠠᠬᠤ ᠠᠴᠠ 1-2 ᠡᠳᠦᠷ ᠦᠨ ᠡᠮᠦᠨᠡ ᠪᠠᠷᠢᠵᠤ ᠨᠣᠭᠲᠣᠯᠠᠨ ᠲᠠᠯᠪᠢᠵᠤ᠂ ᠨᠣᠭᠲᠤ ᠳᠤ ᠳᠠᠰᠬᠠᠨᠠ᠃ ᠤᠨᠠᠭᠠᠨ ᠤ ᠨᠣᠭᠲᠤ ᠳᠤ ᠲᠡᠮᠡᠭᠡᠨ ᠦ ᠡᠷᠡ ᠨᠣᠣᠰᠣ ᠶᠢ ᠬᠣᠶᠢᠮᠣᠰᠣᠯᠠᠨ ᠵᠥᠪ ᠡᠷᠴᠢᠯᠡᠨ ᠲᠠᠮᠤᠵᠦ ᠬᠢᠨᠡ᠃ ᠮᠠᠷᠠᠯ ᠭᠤᠷᠮᠤᠰᠤᠯᠠᠨ ᠰᠦᠯᠵᠢᠵᠦ ᠬᠢᠬᠦ᠂ ᠳᠠᠪᠤᠤ ᠮᠠᠰᠢᠨᠳᠠᠵᠤ ᠬᠢᠬᠦ ᠠᠷᠭᠠ ᠥᠷᠭᠡᠨ ᠳᠡᠯᠭᠡᠷ ᠪᠣᠯᠤᠯᠠ᠃
ᠤᠨᠠᠭᠠᠨ ᠤ ᠨᠣᠭᠲᠤ ᠳᠤ 110 ᠰᠠᠨ᠋ᠲ᠋ᠢᠮᠧᠲᠷ ᠣᠷᠴᠢᠮ ᠮᠠᠲ᠋ᠧᠷᠢᠶᠠᠯ ᠬᠦᠷᠦᠨᠡ᠃ ᠨᠣᠭᠲᠤ ᠶᠢᠨ ᠡᠷᠡᠦ ᠰᠢᠨᠠ ᠶᠢ 9 ᠰᠠᠨ᠋ᠲ᠋ᠢᠮᠧᠲᠷ ᠣᠷᠴᠢᠮ ᠬᠣᠶᠢᠮᠣᠰᠣᠨ ᠲᠠᠮᠤᠮᠠᠯ ᠪᠠ ᠭᠤᠷᠮᠤᠰᠤᠨ ᠰᠦᠯᠵᠢᠮᠡᠯ ᠢᠶᠡᠷ ᠳᠠᠪᠬᠤᠷᠯᠠᠨ ᠭᠠᠷᠭᠠᠳᠠᠭ᠃ ᠨᠣᠭᠲᠤ ᠶᠢᠨ ᠭᠣᠭᠴᠣᠭᠠ ᠨᠤᠭᠤᠳ 5-6 ᠰᠠᠨ᠋ᠲ᠋ᠢᠮᠧᠲᠷ᠂ ᠬᠠᠮᠠᠷ 10-12 ᠰᠠᠨ᠋ᠲ᠋ᠢᠮᠧᠲᠷ ᠳᠠᠪᠬᠤᠷᠯᠠᠨ ᠭᠠᠷᠭᠠᠨ ᠬᠢᠵᠦ ᠨᠣᠭᠲᠤ ᠶᠢᠨ ᠬᠠᠮᠠᠷ ᠤᠨ 2 ᠰᠠᠯᠠᠭᠠᠨ ᠤ ᠲᠠᠯᠠ ᠶᠢᠨ ᠰᠠᠯᠠᠭᠠ ᠶᠢ 0.5 ᠰᠠᠨ᠋ᠲ᠋ᠢᠮᠧᠲᠷ ᠣᠷᠴᠢᠮ ᠤᠷᠲᠤ ᠬᠢᠪᠡᠯ ᠬᠠᠮᠠᠷ ᠲᠤ ᠭᠡᠮᠲᠦᠯ ᠤᠴᠠᠷᠠᠭᠤᠯᠬᠤ ᠦᠭᠡᠢ ᠮᠥᠨ ᠬᠠᠮᠠᠷ ᠢ ᠦᠷᠦᠯᠲᠡ ᠳᠠᠷᠤᠯᠲᠠ ᠠᠴᠠ ᠬᠠᠮᠠᠭᠠᠯᠠᠵᠤ ᠢᠰᠡᠭᠡᠢ ᠮᠡᠲᠦ ᠶᠢᠨ ᠡᠳ᠋ ᠍ ᠢᠶᠡᠷ ᠵᠥᠭᠡᠯᠡᠪᠴᠢ ᠬᠢᠬᠦ ᠨᠢ ᠠᠰᠢᠭᠲᠠᠢ ᠪᠠᠶᠢᠳᠠᠭ᠃ ᠤᠨᠠᠭᠠᠨ ᠤ ᠨᠣᠭᠲᠤ ᠶᠢᠨ ᠰᠠᠭᠠᠯᠳᠤᠷᠭᠠ ᠰᠢᠯᠢᠪᠴᠢ ᠶᠢᠨ ᠦᠵᠦᠭᠦᠷ ᠡᠴᠡ ᠭᠠᠷᠳᠠᠭ ᠪᠠ 40 ᠰᠠᠨ᠋ᠲ᠋ᠢᠮᠧᠲᠷ ᠡᠴᠡ ᠤᠷᠲᠤ ᠪᠠᠶᠢᠪᠠᠯ ᠲᠣᠬᠢᠷᠠᠮᠵᠢ ᠦᠭᠡᠢ᠃
ᠨᠣᠭᠲᠤ ᠶᠢᠨ ᠬᠠᠴᠠᠷ ᠪᠣᠭᠣᠨᠢᠳᠪᠠᠯ ᠤᠨᠠᠭᠠᠨ ᠤ ᠬᠠᠮᠠᠷ ᠲᠤ ᠰᠢᠭᠢᠳᠴᠦ ᠭᠡᠮᠲᠦᠭᠡᠬᠦ ᠪᠠ ᠤᠷᠲᠤ ᠪᠠᠶᠢᠪᠠᠯ ᠨᠢᠳᠦᠨ ᠳᠦ ᠤᠷᠤᠬᠤ᠂ ᠠᠮᠠᠭᠠᠶᠢᠪᠴᠢᠯᠠᠬᠤ᠂ᠲᠡᠮᠡᠤᠯᠡᠬᠦ ᠳᠦ ᠬᠢᠯᠪᠠᠷᠬᠠᠨ ᠮᠤᠯᠲᠤᠷᠠᠨᠠ᠃
ᠤᠨᠠᠭᠠᠨ ᠤ ᠨᠣᠭᠲᠣ ᠶᠢ ᠬᠢᠬᠦ ᠳᠦ ᠪᠡᠨ ᠰᠢᠨᠠᠨ ᠤ ᠭᠣᠭᠴᠣᠭᠠᠨ ᠠᠴᠠ ᠬᠤᠢᠮᠤᠰᠤᠯᠠᠨ ᠲᠣᠮᠣᠰᠤᠨ ᠡᠷᠴᠢᠨ ᠦ ᠪᠡᠨ ᠵᠠᠪᠰᠠᠷ ᠰᠦᠯᠵᠢᠬᠦ ᠵᠠᠮ ᠢᠶᠠᠷ ᠭᠠᠷᠭᠠᠨᠠ᠃ ᠰᠦᠯᠵᠢᠬᠦ ᠦᠭᠡᠢ ᠲᠤᠤᠬᠠᠢ ᠵᠠᠩᠭᠢᠯᠠᠭᠠ ᠪᠠᠷ ᠭᠠᠷᠭᠠᠪᠠᠯ ᠤᠨᠠᠭᠠᠨ ᠤ ᠬᠠᠴᠠᠷ ᠰᠢᠨᠠ ᠶᠢ ᠦᠷᠡᠵᠦ ᠭᠡᠮᠲᠦᠭᠡᠨᠡ᠃ ᠨᠣᠭᠲᠤ ᠶᠢᠨ ᠰᠢᠯᠢ᠂ ᠬᠠᠮᠠᠷ ᠢ ᠬᠠᠪᠲᠠᠭᠠᠢ ᠬᠢᠬᠦ ᠬᠡᠷᠡᠭᠲᠡᠢ᠃ ᠤᠨᠠᠭᠠᠨ ᠤ ᠨᠣᠭᠲᠣ ᠲᠤᠭᠤᠯ ᠤᠨ ᠨᠣᠭᠲᠣ ᠠᠴᠠ ᠬᠠᠮᠠᠷ ᠤᠷᠲᠤ᠂ ᠪᠣᠲᠣᠭᠣᠨ ᠤ ᠨᠣᠭᠲᠣ ᠡᠴᠡ ᠪᠣᠭᠣᠨᠢ ᠬᠡᠮᠵᠢᠶᠡ ᠲᠡᠢ ᠪᠠᠶᠢᠳᠠᠭ ᠢᠶᠠᠷ ᠢᠯᠭᠠᠭᠳᠠᠨᠠ᠃
ᠨᠣᠭᠲᠤ ᠶᠢᠨ ᠪᠤᠷᠤᠭᠤ ᠠᠴᠠ ᠡᠭᠦᠰᠬᠦ ᠭᠡᠮᠲᠦᠯ ᠦᠳ
ᠳᠠᠪᠤᠤ ᠪᠠᠷ ᠬᠢᠭᠰᠡᠨ ᠨᠣᠭᠲᠣ ᠬᠥᠯᠥᠰᠥ ᠴᠢᠭᠢᠭ ᠲᠤ ᠬᠢᠯᠪᠠᠷᠬᠠᠨ ᠨᠣᠷᠴᠤ ᠠᠭᠰᠢᠨ ᠰᠢᠭᠢᠳᠴᠦ ᠭᠡᠮᠲᠦᠯ ᠤᠴᠠᠷᠠᠭᠤᠯᠳᠠᠭ ᠠᠴᠠ ᠦᠷᠭᠦᠯᠵᠢ ᠦᠵᠡᠵᠦ ᠰᠢᠯᠭᠠᠵᠤ ᠪᠠᠶᠢᠬᠤ᠃ ᠰᠢᠭᠢᠳᠦᠭᠰᠡᠨ ᠨᠣᠭᠲᠣ ᠰᠢᠷᠬᠠ ᠡᠭᠦᠰᠬᠡᠭᠰᠡᠨ ᠡᠴᠡ ᠵᠤᠨ ᠳᠤ ᠦᠲᠦᠬᠦ ᠠᠶᠤᠯ ᠴᠤ ᠲᠣᠬᠢᠶᠠᠯᠳᠤᠨᠠ᠃ ᠡᠭᠦᠨ ᠡᠴᠡ ᠪᠣᠯᠵᠤ ᠴᠠᠭᠠᠨ ᠦᠰᠦ ᠡᠭᠦᠰᠬᠦ ᠪᠣᠯᠤᠨ ᠲᠣᠯᠣᠭᠠᠢ ᠳᠤ ᠪᠠᠨ ᠬᠣᠷᠢᠭ ᠵᠠᠩ ᠲᠠᠢ ᠮᠠᠯ ᠪᠣᠯᠤᠨᠠ᠃
ᠲᠣᠬᠢᠷᠠᠭᠠ ᠦᠭᠡᠢ ᠨᠣᠭᠲᠣ ᠤᠷᠠᠭᠳᠠᠬᠤ ᠳᠤ ᠪᠠᠨ ᠠᠮᠠᠷᠬᠠᠨ ᠤᠴᠢᠷ ᠣᠯᠠᠨ ᠳᠠᠬᠢᠨ ᠵᠠᠰᠠᠵᠤ ᠰᠡᠯᠪᠢᠬᠦ ᠳᠠᠪᠬᠤᠷ ᠠᠵᠢᠯᠯᠠᠭᠠ ᠱᠠᠭᠠᠷᠳᠠᠨᠠ᠃
ᠰᠠᠬᠤᠤ ᠮᠡᠲᠦ ᠶᠢᠨ ᠡᠪᠡᠳᠴᠢᠨ ᠦ ᠦᠶᠡ ᠳᠦ ᠪᠣᠬᠢᠷᠳᠠᠭᠰᠠᠨ ᠨᠣᠭᠲᠣ ᠴᠢᠨᠠᠭᠰᠢ ᠡᠪᠡᠳᠴᠢᠨ ᠲᠠᠷᠬᠠᠭᠠᠬᠤ ᠠᠶᠤᠯ ᠲᠠᠢ ᠤᠴᠢᠷ ᠠᠷᠢᠭᠤᠳᠬᠠᠨ ᠴᠡᠪᠡᠷᠯᠡᠵᠦ ᠪᠠᠶᠢᠬᠤ ᠬᠡᠷᠡᠭᠲᠡᠢ᠃
ᠨᠣᠭᠲᠣ᠂ ᠴᠢᠭᠲᠠ᠂ ᠵᠡᠯᠡ ᠶᠢ ᠲᠣᠬᠢᠷᠠᠭᠤᠯᠬᠤ ᠦᠭᠡᠢ ᠡᠴᠡ ᠣᠷᠢᠶᠠᠴᠠᠯᠳᠤᠵᠤ ᠬᠥᠯ ᠢᠶᠡᠨ ᠭᠡᠮᠲᠦᠭᠡᠬᠦ ᠤᠳᠠᠭᠠ ᠴᠤ ᠪᠠᠶᠢᠳᠠᠭ᠃ ᠢᠮᠠᠭᠲᠠ ᠠᠩᠬᠠᠷᠤᠯ ᠲᠠᠯᠪᠢᠬᠤ ᠨᠢ ᠮᠠᠯᠴᠢᠨ ᠬᠦᠮᠦᠨ ᠦ ᠡᠭᠦᠷᠭᠡ᠃